Me rastin e takimit të ardhshëm të Këshillit Konsultativ për Sigurinë Kombëtare më 15 shkurt,  i cili do të trajtojë çështje që lidhen me rreziqet dhe kërcënimet për sigurinë kombëtare të Bullgarisë dhe gjendjen e Forcave të Armatosura, Presidenti Rumen Radev komentoi se kriza Ukrainë-Rusi përbën një kërcënim për sigurinë e tërë Europës. Sipas kreut të shtetit, kjo është një krizë me përmasa globale dhe nuk kërcënon vetëm Bullgarinë dhe rajonin. Radev theksoi se dialogu zhvillohet në nivelin më të lartë - ndërmjet SHBA-së dhe Rusisë, NATO-s dhe Rusisë, BE-së dhe Rusisë, ndërsa Bullgaria është pjesë e përpjekjeve për uljen e tensioneve. “Të gjithë duhet të punojmë në atë mënyrë që të shmangim zgjidhjen e kësaj krize me mjete ushtarake, zgjidhja mund të arrihet me diplomaci dhe po bëhen të gjitha përpjekjet në këtë drejtim”, tha kreu i shtetit.

Presidenti u njoh sot me analizën e gjendjes dhe stërvitjes së Forcave të Armatosura në vitin 2021, të prezantuara nga shefi i mbrojtjes, Admirali Emill Eftimov. Sipas Radev, kërcënimi më i madh për sigurinë tonë kombëtare është neglizhenca e problemeve të Forcave të Armatosura dhe angazhimeve tona aleate. Presidenti vuri në dukje se angazhimi i qeverisë për zhvillimin e Forcave të Armatosura duhet të jetë konstante dhe e qëllimshme. Kreu i shtetit theksoi se këto angazhime nuk duhet të kufizohen në veprime të njëhershme për blerjen e pajisjeve dhe armëve të reja.

Rumen Radev deklaroi se modernizimi është një proces i vazhdueshëm i ndërtimit të aftësive mbrojtëse me fokus kryesisht tek njerëzit në ushtri, tek teknologjitë dhe risitë.