Koalicioni GERB-SDS po fillon bisedimet për të diskutuar veprimet e përbashkëta politike në kuadër të Legjislaturës së 51-të të Kuvendit Popullor, njoftoi qendra e shtypit e partisë GERB. Takimet fillojnë më 13 nëntor. Për orën 8:30 të mëngjesit janë të caktuara bisedimet me Koalicionin “BSP – E Majta e Bashkuar” dhe në orën 09:30 me partinë “Ka një popull të tillë”. Bisedimet do të zhvillohen në godinën e Kuvendit Popullor. Nga ana e GERB - SDS takimet do t'i udhëheq kryetari i partisë Bojko Borisov, së bashku me deputetët Raja Nazarjan, Tomisllav Donçev dhe Rosen Zheljazkov. Orët e bisedimeve janë para orës 11, kur fillon seanca e parë e Legjislaturës së 51-të të Kuvendit Popullor, e cila u ndërpre më 11 nëntor. Të hënën mbledhja u ndërpre pasi deputetët nuk arritën të zgjidhnin kryetar të parlamentit.

Me rastin e takimeve të ardhshme, lideri i GERB-it, Bojko Borisov, edhe një herë parashtroi perspektivat për formimin e kabinetit në Asamblenë e 51-të Kombëtare. Sipas tij, konstruksioni i mundshëm i partive që mund të funksionojnë përfshin ITN, BSP, GERB-SDS dhe PP-DB. Bisedimet do të nisin me ITN dhe BSP, në varësi të ecurisë së tyre do të vijojë takimi me PP-DB. Borisov theksoi sërish se e vetmja mënyrë për të pasur përgjegjësi të qartë politike në një koalicion të tillë qeverisës është që ai të jetë kryeministër.