"Ngjitës për mjekrën" - kënga për Krishtlindje që këndohet edhe gjatë verës

Stefan Vëlldobrev njihet për aftësinë e tij për të ndjerë pulsin e kohës me tekstet që krijon – të drejtpërdrejta, poetike, të bukura. Ai pranon se i pëlqejnë njësoj të gjitha zhanret e artit të cilave u është përkushtuar dhe varieteti e karikon atë: "Duhet t'u tregosh një histori njerëzve, t'i prekësh - nuk ka fare rëndësi nëse e tregon përmes poezisë, rimave, prozës, përmes trupit dhe mimikave të fytyrës, përmes zërit, ose melodisë!”. Prandaj, përveç diplomimit në Akademinë Kombëtare të Arteve të Teatrit dhe Filmit dhe pjesëmarrjes në një sërë projektesh teatrore dhe filmike, publikimit të nëntë albumeve me këngë origjinale dhe kompozimit të muzikës për dhjetëra filma vendas dhe shfaqje teatrale, Vëlldobrev plotësoi diversitetin e nevojshëm duke krijuar grupin "Të dyshuarit e zakonshëm". Kështu, së bashku me muzikantët e shquar Ivan Leçev, Veselin Veselinov-Eko, Mirosllav Ivanov dhe Stojan Jankullov-Stunxhi, ata kanë 12 vjet që frymëzojnë të rinj e të mëdhenj. Këngët e tyre memorizohen nga publiku brenda dhe jashtë vendit dhe një gjë e domosdoshme për set-listat, edhe në verë, është edhe një këngë e Krishtlindjeve:

“Ngjitës për mjekrën” u shfaq në vjeshtën e vitit 2019 – kujton Stefan Vëlldobrev për Radio Bullgarinë. - Doja shumë ta regjistroja në një aranzhim për një orkestër simfonike. Në atë kohë punoja në Operën e Plovdivit, me të cilën kishim bërë një turne jashtëzakonisht të suksesshëm "Më ngadalë Symphony" dhe desha të vazhdojmë bashkëpunimin tonë. Tekstin e këngës e kam shkruar gjatë gjithë verës, ndërsa përshtatjen për orkestrën e kanë bërë kompozitori Petër Kerkellov dhe dirigjenti Konstantin Dobrojkov. E incizuam në Studion e Parë të BNR-Plovdiv. Më pas gjithçka filloi të realizohej shumë ngadalë dhe kënga ishte gati disa ditë para Krishtlindjeve. Nuk patëm kohë as të xhironim videoklipin e as ta lëshonim nëpër radio dhe pas disa muajsh filloi pandemia dhe ndodhi kështu që filluam ta shfrytëzonim për verat në vijim në të cilat mund të prezantonim këngën tonë të Krishtlindjes”.

Këtë vit, "Të dyshuarit e zakonshëm" nuk do të tradhtojë traditën për të kënaqur publikun me një koncert që bashkon të gjitha festat e fundvitit në një ditë:

“Unë përpiqem ta shmang punën në ditët e festave të krishtera sepse jam një person besimtar dhe mendoj se në këto ditë të gjithë duhet të jenë me familjen e tyre. Megjithatë, menjëherë pas Krishtlindjeve vjen dita e Shën Stefanit (27.12), kur marr më shumë urime sesa marr për ditëlindjen time. Madje ne kemi edhe të ashtuquajturën "dhjetë ditëshe" të "Të dyshuarit e zakonshëm", që fillon më 26 dhjetor, kur është ditëlindja e njërit prej kitaristëve tanë - Mirosllav Ivanov, më 27 unë dhe Stojan Jankullov festojmë ditën e emrit, dhe më 1 janar është dita e Veselin Veselinovit-Eko, dhe më pas është dita e shën Ivanit, kur kitaristi ynë tjetër Ivan Leçev feston. Të gjitha këto raste i kombinojmë me një koncert më 27 dhjetor dhe e di që për ditën e emrit nuk ftohen njerëz, por ata gjithmonë vijnë dhe jam shumë i lumtur për këtë”.

Stefan Vëlldobrev pëlqen të bëjë arratisje dimërore në bregun bullgar të Detit të Zi. Vendi që e "ndihmoi" në krijimin e dy prej albumeve të grupit - është Sozopol.

“Zakonisht preferoj që kjo të ndodhë në vjeshtë, në dimër apo në fillim të pranverës, pasi atëherë jam vetëm dhe nuk ka asgjë më frymëzuese se ato momente. Vera nuk është një stinë për të kompozuar dhe menduar, por për të paraqitur atë që tashmë është menduar. Por vjeshta dhe dimri në Sozopol janë të mrekullueshme!"

Së fundmi, "Të dyshuarit e zakonshëm" publikuan një videoklip të ri për albumin "Pikëpyetje Pikëçuditëse". Edhe pse nuk u filmua në Sozopol, emri i këngës është elokuent për temën e saj - "Deti i Zi Bardh e Zi". Të ftuar special janë fëmijët e studios vokale “Dëga”. Në fund të janarit apo në fillim të shkurtit, presim të shohim një tjetër videoklip – për këngën “Varkat prej letre”, një lloj metafore për jetën.

“I uroj të gjithëve shëndet, dashuri dhe fat në të gjitha përpjekjet tona fisnike”, tha në përfundim Stefan Vëlldobrev. Këto fjalë nuk janë të rastësishme, pasi me këto fjalë ai mbyll çdo koncert të “pesëshes madhështore”.

Foto: Facebook/ Stefan Vëlldobrev

Përgatiti në shqip dhe publikoi: Kostandina Bello