Deklaratat e fundit të kryeministrit të Republikës së Maqedonisë së Veriut, Hristijan Mickoski, në parlamentin në Shkup, se ai nuk sheh arsye për përfshirjen e bullgarëve në Kushtetutën e Maqedonisë së Veriut, shtrembërojnë realitetin dhe minojnë përpjekjet për ndërtimin e marrëdhënieve të mira fqinjësore dhe integrimin evropian të vendit. Ministria jonë e Jashtme në qëndrimin e saj e dënoi kategorikisht deklaratën e Mickoskit.

Çështja e të drejtave të bullgarëve në Maqedoninë e Veriut nuk është një mosmarrëveshje dypalëshe mes dy vendeve tona, por është një çështje që prek vlerat dhe standardet themelore evropiane, theksohet në qëndrimin e Ministrisë së Punëve të Jashtme. Gjithashtu përkujtohet se një numër i madh i qytetarëve të Maqedonisë së Veriut kanë marrë nënshtetësinë bullgare, duke njohur origjinën dhe identitetin e tyre bullgar. Vetëm përmes zbatimit të plotë dhe gjithëpërfshirës të Konsensusit Evropian, të miratuar nga Këshilli i Bashkimit Evropian (BE) në vitin 2022, pjesë e rëndësishme e të cilit janë ndryshimet në Kushtetutën e vendit, është i mundur përparimi në procesin e integrimit evropian të RSM-së, thekson në qëndrimin e saj Ministria e Punëve të Jashtme.

Në këtë kontekst, Maqedonia e Veriut, si një vend kandidat për anëtarësim në BE, ka përgjegjësinë që legjislacioni dhe praktika e saj të përputhen me këto parime, shton Ministria e Punëve të Jashtme.

Në vend të retorikës së urrejtjes dhe ndarjes, autoritetet në RSM duhet të fokusohen në përmbushjen e kritereve për anëtarësim në BE, duke përfshirë mbrojtjen e të drejtave të të gjitha bashkësive etnike në vend, bën thirrje MPJ-ja, duke theksuar: “Vetëm përmes dialogut të sinqertë dhe respektit të ndërsjellë mund të arrijmë zhvillim të qëndrueshëm dhe prosperitet të popujve tanë në një Evropë të bashkuar”.

Dje, 12 shkurt, nga foltorja e Kuvendit të Shkupit, Hristijan Mickoski deklaroi se pyetja e vërtetë është se pse duhet të përfshihen në kushtetutë rreth 700-800 bullgarë në Maqedoninë e Veriut, të cilët deklarojnë se gjuha e tyre amtare është bullgarishtja dhe pse nuk ka një kërkesë të tillë për Shqipërinë.

Lexoni më tepër në arkivin e Radio Bullgarisë:

• Presidenti Radev shpreson se Maqedonia e Veriut do të tregojë vullnet politik dhe do të hapë rrugën e saj drejt BE-së

• KE: Maqedonia e Veriut ende nuk i ka përfshirë bullgarët në kushtetutë

• Ursula von der Leyen i bëri thirrje Maqedonisë së Veriut që të përfshijë bullgarët në kushtetutë

• Një shoqatë bullgare ka shpërndarë një letër të rëndësishme drejtuar komunitetit shqiptar në Maqedoninë e Veriut