"Buxheti siç është tani duket mjaft i kushtueshëm për një vend që nuk mund të përballojë shpenzime të tilla. Kështu që unë shpresoj që të ketë një qeveri me një shumicë të qartë për ta kundërshtuar atë dhe shpresoj se politika nuk do të fillojë të ndikojë në financat dhe në fund të rezultojë se jo vetëm buxheti, por e gjithë jeta ekonomike është peng i faktit se ne nuk kemi një qeveri të rregullt - theksoi Përvan Simeonov, sociologu i agjencisë së sapokrijuar "Mjara" në një intervistë për Radio Bullgarinë. – Buxheti i propozuar vazhdon praktikën e derdhjes së parave në fusha të ndryshme ku mungojnë reformat dhe përfundon duke vënë kundër njëri-tjetrit grupe të ndryshme.

Lajmi pozitiv që lehtësoi politikanët dhe lumturoi bizneset dhe qytetarët në fund të vitit 2024, ishte anëtarësimi i plotë i Bullgarisë në zonën Shengen, i cili ndodhi zyrtarisht më 1 janar 2025. “Anëtarësimi ynë në Shengen është me të vërtetë diçka për të cilën mund ta përgëzojmë veten, një hap në integrimin tonë evropian, por vështirë se do të shihet si një sukses i madh nga masa” – thekson Përvan Simeonov.

Arritja e synimit kombëtar të radhës – anëtarësimi i plotë në Shengen, nuk do të thotë se nuk duhet të kemi edhe synime të tjera, është i bindur sociologu dhe tregon se ku duhet të drejtohen përpjekjet e politikanëve dhe shoqërisë:

“Një është ulja e shpenzimeve joefikase të fondeve. Këtë e them në kuadër të bisedës buxhetore që po bëhet në këto momente. Qëllimi ynë i dytë duhet të jetë ulja e pabarazive sociale dhe rajonale në vend, si pjesë e një politike të përgjithshme, kushtuar mirëqenies dhe kapitalit njerëzor të vendit. Qëllimi i tretë kombëtar, megjithëse shumë abstrakt, është që në çdo sektor në Bullgari të shfaqen të ashtuquajturat histori suksesi. Vendi duhet të fillojë të ushqejë tek njerëzit vetëbesim, pasi ky është malli në mungesë për momentin”.

Sipas historianit izraelit Yuval Noah Harari, "mungesa e dialogut dhe të kuptuarit e këndvështrimeve të tjera do të thotë se nuk ka demokraci funksionale". Kjo simptomë është në mbarë botën, por ne e vërejmë edhe në vendin tonë, që nga fillimi i pandemisë Covid në 2020. Sidoqoftë, a është e mundur ta përballojmë?:

“Unë jam gjithmonë optimist, sepse e di që e ardhmja është ashtu siç ne e krijojmë dhe realiteti shoqëror në të cilin jetojmë është rezultat i përpjekjeve tona, por është edhe çështje motivimi – thekson politologu Strahill Delijski. - Po, karakteristika kryesore e shoqërive demokratike është aftësia për të dialoguar. Megjithatë, ajo është funksion i të kuptuarit dhe njohjes së barazisë politike. Në një regjim ku grupe të ndryshme të shoqërisë përcaktohen përmes konfliktit me grupet e tjera, kjo nuk mund të ndodhë. Problemet e demokracisë moderne janë të thella dhe komplekse, sepse ajo është e krijuar për të rregulluar marrëdhëniet politike në një sistem shoqëror siç është kapitalizmi i shekullit të 21-të.

Prandaj, mendoj se kjo është një bisedë shumë serioze për marrëdhëniet mes kapitalizmit dhe mundësinë që problemet e tij të rregullohen në mënyrë demokratike. Kam frikë se në Bullgari nuk jemi gati për një bisedë të tillë, megjithëse e shoh që tashmë po ndodh brenda elitave politike botërore, por në përgjithësi jemi shumë larg. Kjo na kufizon në një nivel shumë të ngushtë të të menduarit në lidhje me demokracinë, duke menduar se nëse ndalojmë korrupsionin, çdo gjë do të jetë mirë” – thekson Strahill Delijski dhe tregon si kulmin politik të vitit 2024 dështimin për të formuar një qeveri të rregullt në funksion të qëllimeve të rëndësishme publike.

Sipas tij, Bullgaria dhe bota ndodhen në një moment kur së paku duhet të përpiqen të ndërtojnë një kuptim të ri të përbashkët dhe është mirë që ai të jetë demokratik.