Italia do të hapë në tetor të parën nga dy qendrat për emigrantët në territorin e Shqipërisë. Kështu ka bërë të ditur ministri i Brendshëm italian, Matteo Piantedosi, raporton ANSA. Të dy vendet kanë një marrëveshje për ndërtimin e qendrave për emigrantët e shpëtuar në det nga anijet italiane. Të ardhurit e rinj do të qëndrojnë në Shqipëri ndërkohë që Italia shqyrton kërkesat e tyre për azil. Marrëveshja me Italinë për emigrantët është kritikuar nga opozita shqiptare dhe italiane dhe nga grupet e të drejtave të njeriut. Ajo u kundërshtua në Gjykatën Kushtetuese të Shqipërisë, por vendimi i gjykatës ishte në favor të asaj që u miratua nga zyra e kryeministrit Edi Rama. Marrëveshja ndërmjet Italisë dhe Shqipërisë është shembulli i parë i një vendi joanëtar të BE-së që pranon emigrantë në emër të një shteti anëtar të BE-së.

Qeveria serbe ka urdhëruar Ministrinë e Mbrojtjes që të nisë procedurën për kthimin e shërbimit të detyrueshëm ushtarak në vend. Ai u hoq në vitin 2011 dhe që atëherë Serbia mbështetej në ushtrinë e saj profesionale, raportoi televizioni serb B92. Kohëzgjatja e shërbimit do të jetë 75 ditë, me synimin që vendimi të hyjë në fuqi në mesin e vitit 2025. Aktualisht po saktësohet se si do të shërbejnë rekrutët në njësitë përkatëse organizative të Ushtrisë Serbe dhe Ministrisë së Mbrojtjes, të cilat kërkojnë aftësi më të specializuara teknike.

"Procesi i integrimit brenda BE-së, si për ne ashtu edhe për rajonin, duhet të bazohet në një proces që do të vlerësojë arritjet dhe jo çështjet dypalëshe si faktor vendimtar." Kështu tha kryeministri i Republikës së Maqedonisë së Veriut Hristijan Mickoski, të enjten në Bruksel, ku mori pjesë në një drekë pune të organizuar nga presidentja e Komisionit Evropian, Ursula von der Leyen së bashku me liderët e tjerë të Ballkanit Perëndimor. Sipas Mickoskit, vendi i tij ka dy dekada e gjysmë që përpiqet të hyjë në strukturën evropiane, por është viktimë e çështjeve bilaterale. "Do t'ju kujtoj se në emër të vlerave evropiane, ne ndryshuam flamurin, ndryshuam kartëmonedhat, ndryshuam disa herë Kushtetutën, ndryshuam emrin për të treguar se ne vërtet duam të jemi pjesë e familjes evropiane, " – komentoi ai, cituar nga agjencia MIA. Deklarata vjen në sfondin e një skandali që tronditi Bullgarinë dhe Republikën e Maqedonisë së Veriut, pasi zëvendëskryeministri i RMV-së Aleksandër Nikolloski i quajti bullgarët "të paqytetëruar" në një intervistë televizive.

Rumania do t'i kërkojë BE-së kompensim për ndryshimin e konsiderueshëm në çmimet e energjisë elektrike midis pjesës perëndimore dhe lindore të kontinentit, tha ministri i energjisë i vendit Sebastian Burduzha, cituar nga Radio Romania International. Ai shpjegoi se ndryshimi është për shkak të rënies së prodhimit të energjisë hidroelektrike në vend për shkak të thatësirës, si dhe problemeve me lidhjet mes sistemeve që pengojnë eksportin e energjisë më të lirë nga perëndimi në lindje. Rumania ofron gjithashtu mbështetje energjitike për Moldavinë dhe Ukrainën, gjë që ushtron më tej presion mbi çmimet në vend. Çmimi në Rumani aktualisht është pothuajse 150 EUR/MWh, shumë mbi mesataren evropiane prej gati 102 EUR/MWh.

Breshkat e mbrojtura të gjelbërta të detit dhe breshkat е detit caretta caretta po bëjnë një rikthim aktiv përgjatë brigjeve të dy bazave ushtarake britanike në Qipro. Numri i foleve të tyre tejkalon rekordin e vitit të kaluar me gati 25%, raportuan mbrojtësit e natyrës, të cituar nga BTA. Në këtë vit janë regjistruar 382 fole breshkash deti në plazhet e dy bazave, 100 më shumë se në vitin 2023. "Rritja e menjëhershme e numrit të foleve të breshkave është rezultat i një qasjeje të qëndrueshme, sistematike pa ndërhyrje të drejtpërdrejtë njerëzore, së bashku me zbatimin e përpjekjeve për të minimizuar aktivitetet e paligjshme dhe të dëmshme në plazhet e foleve," tha për Associated Press Aleksija Perdiu, një specialiste për mjedisin, si dhe oficer policie. Britania e Madhe ka ruajtur dy baza ushtarake përgjatë bregdetit jugor të Qipros që kur ishulli lindor i Mesdheut fitoi pavarësinë nga sundimi i tij kolonial në vitin 1960.

Përpiloi: Miglena Ivanova

Foto: ansa.it, vs.rs/sr, vlada.mk,forbes.ro, apnews.com