Në vitet 1920, kopshtarët bullgarë - të njohur për aftësitë e tyre - u vendosën në afërsi të qyteteve të mëdha çeke, ku krijuan një shkollë private bullgare, që të njohin fëmijët e tyre rrënjët dhe gjuhën amtare.

Duke rrëfyer historinë 75-vjeçare të shkollës së mesme bullgare "Dr. Petër Beron" në Pragë, drejtoresha Maria Nosikova thekson punën pioniere në atë kohë të bullgarëve patriotë. E megjithëse shkolla e tanishme u hap në vitin 1948 me vendim të Ministrisë së Arsimit, trashëgimtarët e saj i konsiderojnë pikërisht ata bullgarë të parë patriotë themelues shpirtërorë të shkollës.

“Përvjetorin e shkollës do ta festojmë me shumë ngjarje – thotë Maria Nosikova për Radio Bullgarinë. - Kryesorja është koncerti festiv nën moton "75 vjet shpirt, kulturë dhe iluminizëm bullgar në zemër të Evropës", i cili do të mbahet më 31 mars në sallën e madhe të bibliotekës së qytetit në Pragë. Më pas, në sheshin në zemër të qytetit, do të ketë një skenë të hapur ku grupet e shumta vizitore - kryesisht nga Bullgaria - do të kenë mundësinë të performojnë. Në këtë vend do të jetë edhe Pazari i Pashkëve. Dhe duke qenë se priten shumë bullgarë dhe jo vetëm, ne dëshirojmë të tregojmë fytyrën më të mirë, autentike dhe origjinale të vendit tonë”.

Për të ringjallur kujtimet e dashura të kohës së kaluar në shkollën bullgare, për herë të parë njerëz nga gjenerata të ndryshme do të mblidhen në një takim të ish-maturantëve. Dy prej tyre - Cvetelinka Mallçeva dhe Ivo Rashev - arritën të gjenin afro 200 ish nxënës dhe u dërguan ftesa të gjithëve. “Kemi më shumë se njëqind konfirmime dhe mezi e presim ngjarjen”, thotë drejtoresha. Maria Nosikova e drejton vëmendjen te arritjet e më të rinjve.

“Ne jemi shumë krenarë për atletët tanë që erdhën këtu sepse ata janë pranuar në ekipet elitare të hokejit. Ata janë gjithashtu pjesë e skuadrës kombëtare të hokejit të akullit të Bullgarisë dhe njëri prej tyre, Nino Tomov, tashmë luan për Kanadanë. Jemi krenarë edhe për fëmijët tanë të cilët pas mbarimit të shkollës po vazhdojnë shkollimin si në universitetet bullgare, ashtu edhe në Çeki, në Gjermani. Vitin e kaluar ishim shumë të kënaqur me studentët tanë të pranuar në Universitetin Karlova - një nga universitetet më elitare në Evropë."

Aktualisht shkollën bullgare në Pragë e frekuentojnë 130 nxënës nga klasa e parë deri në klasën e njëmbëdhjetë. Dhe këta janë jo vetëm fëmijë bullgarë, por edhe të tillë me origjinë të huaj - armenë, sirianë, ruso-polakë, ukrainas. “Ne shikojmë nga e ardhmja dhe sfidat përpara”, thotë drejtoresha e tyre. Dhe duke qenë se po e bëjmë bisedën në prag të zgjedhjeve, prandaj është me rëndësi të madhe, sipas saj, të jemi qytetarë aktivë dhe të zgjojmë vetëdijen tonë ende në shkollë:

“Është jashtëzakonisht e rëndësishme që çdo person të ketë një pozicion qytetar, nëse vërtet duam që vendi ynë të ketë një të ardhme, ta ndiejmë normalitetin – thekson Maria Nosikova. – Ne po jetojmë këtu dhe e shikojmë dallimin midis asaj që është në Bullgari dhe asaj që është në Republikën Çeke. Dhe nëse duam që vendi ynë të ecë përpara, duhet jo vetëm të votojmë, por edhe të huazojmë nga përvoja e mirë që kanë të tjerët. Dallimi është në standardin ekonomik, në besimin tek institucionet. Çekët shpesh bëjnë sondazhe ndër qytetarët, dhe një prej tyre ishte një sondazh se cilat institucione në vend kanë më shumë besim. Në radhë të parë kishin treguar policinë, dhe në radhë të dytë - gjykatën. Kjo shpjegon shumë gjëra.”

Shikoni gjithashtu:

• Operatori Asen Shopov – i suksesshëm në profesionin e tij në Çeki, por i dashuruar me Bullgarinë

• Instituti Kulturor i Bullgarisë në Pragë është plot me shpirt rinor dhe histori frymëzuese

Përgatiti në shqip: Vesella Mançeva

Foto: Shkolla "Dr. Petër Beron" në Pragë