Bullgaria dhe Hungaria ndajnë besimin se zgjidhja e konfliktit në Ukrainë nuk do të vijë me më shumë armë, por me më shumë dialog dhe përpjekje diplomatike për t’u dhënë fund armiqësive. Këtë e deklaroi presidenti Rumen Radev pasi priti presidenten e Hungarisë, Katalin Novak, në kuadër të vizitës së saj zyrtare në Bullgari.

Presidentët diskutuan për pasojat e luftës në Ukrainë dhe vazhdimin e konfliktit dhe bënë thirrje për një paqe të qëndrueshme. Të dy vendet po e shikojnë me shqetësim pushtimin në kontekstin e sigurisë dhe të drejtave të komuniteteve bullgare dhe hungareze në territorin ukrainas.

“Përshkallëzimi i konfliktit kërcënon sigurinë e gjithë Evropës, duke u shndërruar në një luftë rraskapitjeje jo vetëm për vendet ndërluftuese, por edhe për ekonomitë dhe sistemet sociale evropiane”, tha Radev.