Pak më shumë se 6.6 milionë janë qytetarët bullgarë që kanë të drejtë vote sot. Zgjedhja e tyre do të formojë përbërjen e Parlamentit të Bullgarisë, i cili përbëhet prej 240 anëtarësh. Këto janë zgjedhjet e katërta në vendin tonë brenda 18 muajve të fundit. I pyetëm qytetarët për qëndrimet dhe pritshmëritë e tyre për zhvillimin e situatës në vend pas 2 tetorit. Në përgjithësi ndihet lodhje, një dëshirë e qartë për ndryshim dhe transparencë në qeverisjen politike dhe një shpresë e matur se kjo do të ndodhë pas zgjedhjes së Asamblesë së ardhshme Kombëtare të 48-të.

Votimi i sotëm i parakohshëm nuk është aspak befasues për Elenën nga Sofja, rreth 30 vjeçe, e martuar me dy fëmijë dhe biznes të vet.

“Edhe pse shpresoja që koalicioni do të arrinte një marrëveshje dhe nuk do të arrinte deri këtu, nuk jam e befasuar”, tha ajo.

Sipas Elenës arsyeja është sepse ka shumë interesa personale pas asaj që shihet nga shoqëria. Aleksandra është e të njëjtit mendim:

“E prisja, pasi politikanët bullgarë në vend të parë i mbrojnë interesat e veta, sesa interesat e të gjithë kombit.

Martin, i cili punon në fushën e teknologjisë IT, pranon se ka mbetur disi i befasuar nga zhvillimi i situatës.

“Por nga ana tjetër, skena politike në Bullgari ka qenë gjithmonë e paparashikueshme, ndaj ndoshta ishte e pritshme”, thotë ai, por në mënyrë kategorike deklaron se sot do të ushtrojë të drejtën e votës.

“Mendoj se në sfondin e konflikteve që kanë shpërthyer vitin e fundit dhe pikërisht tani në këtë situatë të inflacionit në mbarë botën, është e nevojshme që secili prej nesh të mbajë një pozicion dhe ta mbrojë atë. Votimi është një mënyrë e tillë. Unë personalisht do të votoj për të renë dhe të ndryshmen, që nuk ka qenë kurrë në skenën politike në vendin tonë” – tha i riu bullgar.

“Ne jemi të detyruar të ushtrojmë të drejtën e votës dhe të zgjedhim njerëzit që do të na qeverisin. Përndryshe çdo gjë do të ndodhë sërish – deklaron nëna e re Maja.- Nuk u besoj premtimeve politike që bëjnë të gjithë. Përkundrazi, u besoj vetëm disa personaliteteve që më pëlqejnë dhe pikërisht për ta do të jap votën time, e cila do të përfaqësojë zgjedhjen time për të ardhmen e familjes dhe fëmijës tim”, shtoi ajo.

“Do të votoj për një qeveri më të ndershme dhe transparente – na shpjegon Elena. Kështu qe gjërat të ndodhin më lehtë në Bullgari, duke filluar me digjitalizimin e më shumë proceseve dhe duke i bërë të gjitha projektet të dukshme dhe të qarta për të gjithë. Shpresoj që e gjithë kjo të ndodhë. Sigurisht që do të jetë një proces i ngadaltë. Por unë mendoj se njerëzit kanë filluar të ndryshojnë qëndrimet dhe të menduarit e tyre dhe besoj se shoqëria civile duhet të jetë katalizatori që do të çojë në këtë ndryshim”.

"Dua që të ketë një jetë më të mirë për fëmijët që po rriten tani, për njerëzit që po zhvillohen tani. Të kemi vende pune potenciale për gjithnjë e më shumë qytetarë. Nuk duhet të ketë arsye për trajtim diskriminues” – i vizaton ëndrrat e saj Aleksandra.

Zgjedhjet e shpeshta në dy vitet e fundit ngritën qartë çështjen e votës së bullgarëve jashtë vendit. Deri në datën 6 shtator 2022, afati i fundit për dorëzimin e kërkesave për votim jashtë vendit, janë regjistruar 50 865 aplikime në KQZ. Zbulohen gjithsej 755 qendra votimi në 61 vende, më shumë në Turqi – 166, Britaninë e Madhe – 126, Gjermani – 77, Greqi – 72, Spanjë – 65.

A munden bashkatdhetarët tanë jashtë vendit të bëjnë një zgjedhje mjaft të informuar dhe a kanë të drejtë morale të vendosin për të ardhmen e njerëzve që jetojnë në Bullgari – këto ishin vetëm disa nga pyetjet e qytetarëve pas zgjedhjeve parlamentare të nëntorit 2021.

“Mendoj se bullgarët jashtë vendit, veçanërisht në votimet e fundit, kanë një kontribut të madh në rezultatet e tyre. Unë personalisht mendoj se ata duhet të kenë të drejtën e votës”, thotë Maja.

Për Martinin, kjo është përgjegjësia e tyre si qytetarë:

“Qëndrimi im është që çdo qytetar bullgar, pavarësisht se ku ndodhet, duhet të ketë të drejtën e votës për të ardhmen e vendit të tij. Në fund të fundit, nuk duhet përjashtuar fakti që familjet e shumë prej këtyre njerëzve vazhdojnë të jetojnë këtu. Ata kanë përgjegjësinë të jenë votues për vendin e tyre”, na shpjegoi Martin qëndrimin e tij.

“Le të mos harrojmë se në çdo moment ata mund të vendosin të kthehen këtu. Mendoj gjithashtu se këta bashkatdhetarët tanë kanë një pikëpamje shumë më objektive për atë që po ndodh këtu, pikëpamje kjo e cila nuk është e rënduar politikisht”, thekson Elena.

Mbetet për t'u parë se sa nga bashkatdhetarët tanë jashtë vendit do ta ushtrojnë sot të drejtën e tyre qytetare për të votuar.

A do gjejnë të gjitha shpresat për një të nesërme më të ndritshme shprehjen e tyre parlamentare në fletëvotim?

“Përpiqem të mbaj një qëndrim pozitiv”, thotë Martin, “ndonëse krahasuar me atë që ka qenë vitet e fundit, nuk është e vështirë të qëndrosh negativ”. Shpresoj për më të mirën, por çfarë do të ndodhë – duhet të shohim”.

“Fatkeqësisht, ndjenja ime është se gjërat nuk do të ndryshojnë dhe nuk do të kemi një parlament funksional, i cili do të çojë në zgjedhje të reja të jashtëzakonshme parlamentare”, tha në përfundim Maja për Radio Bullgarinë në lidhje me votimin e sotëm parlamentar në vendin tonë.

Foto: Ani Petrova, BGNES, Facebook /RodinaSydney