Në sfondin e krizës energjetike në Evropë, po diskutohen mundësitë e eksportimit të energjisë elektrike nga Ukraina në BE, gjë që do të ndihmojë Evropën të zvogëlojë varësinë e saj nga transportuesit rusë të energjisë. Rritja e vëllimeve të furnizimeve me energji në 2000 MW do t'i lejojë Ukrainës të integrohet në tregun e brendshëm të BE-së. Kështu ka shkruar në Facebook kryeministri ukrainas Denis Shmigal pas përfundimit të Këshillit të Asociimit BE-Ukrainë në Bruksel. “Deri në fund të vitit ne planifikojmë të përmbushim 7 kushte dhe të fillojmë negociatat për anëtarësim në BE”, shton Shmigal. U nënshkrua një marrëveshje sipas së cilës Ukraina do të marrë 500 milionë euro nga BE-ja për të mbështetur stabilizimin e buxhetit të shtetit.

Ndërkohë, po vazhdojnë përpjekjet e forcave ruse për të vendosur kontroll të plotë mbi territorin e rajonit të Doneckut, për të ruajtur pozicionet e tyre në zonat e pushtuara përkohësisht në Herson dhe pjesë të rajoneve Harkov, Zaporozhie dhe Nikolaev. Njësitë ushtarake ukrainase vazhdojnë operacionin mbrojtës për të parandaluar avancimin e trupave ruse brenda vendit, njoftoi Shtabi i Përgjithshëm i Forcave të Armatosura të Ukrainës në ditën e 195 të kundërshtimit të agresionit rus.

Nënkryetari i administratës së Hersonit të emëruar nga Rusia, Kiril Stremousov, tha në një intervistë televizive se planet për të mbajtur një referendum në rajonin Herson në Ukrainë të kontrolluar nga Rusia janë ngrirë përkohësisht. Kjo ndodhi pasi Zelenski njoftoi suksese gjatë kundërofensivës në Ukrainën Jugore.

Katër nga gjashtë përfaqësuesit e ekipit të inspektimit të Agjencisë Ndërkombëtare të Energjisë Atomike në centralin atomik “Zaporizhie” u larguan nga vendi i centralit. Dy ekspertët e mbetur pritet të qëndrojnë përhershëm në selinë qendrore për të dhënë vlerësime të pavarura. Sot, agjencia do të paraqesë një raport në Këshillin e Sigurimit të OKB-së mbi misionin e saj në objektin bërthamor. Një nga gjashtë reaktorët vazhdon të prodhojë energjinë elektrike të nevojshme për centralin e Zaporizhies për ftohje dhe funksione të tjera të sigurisë bërthamore, bëri të ditur Agjencia Ndërkombëtare e Energjisë Atomike. Moska dhe Kievi akuzojnë njëri-tjetrin për bombardimet në zonë.

"Ne as që e kishim menduar në maj të vitit 1945 që një luftë e tillë do të fillonte përsëri... Kush do ta kishte menduar se do të ndodhte një gjë e tillë?... Vdiqën 8 milionë ukrainas në Luftën e Madhe Patriotike, ishim së bashku në llogore”, tha veterani rus 97-vjeçar i Luftës së Dytë Botërore, Vladimir Stepanov në një intervistë për versionin rus të “Evropa e Lirë”.