Në samitin kyç të BE-së për Ukrainën në Bruksel, vendi pret të marrë statusin e kandidatit. Në fjalimin e tij të mbrëmjes, Presidenti ukrainas Vollodimir Zelenski tha se zhvilloi bisedime edhe me Kryeministrin bullgar Kirill Petkov.

“Që në mëngjes fillova maratonën telefonike për një vendim pozitiv për kandidaturën e Ukrainës. Bisedova me 11 liderë të mërkurën. Falënderova Kryeministrin bullgar Petkov për mbështetjen e tij për Ukrainën dhe për zhvillimin e të gjithë Evropës me pjesëmarrjen e saj”, tha Zelenski.

Duke folur për AP, Zëvendëskryeministrja ukrainase Ollga Stefanishina, e cila është përgjegjëse për integrimin evropian, tha se Holanda, Suedia dhe Danimarka nuk ishin dakord të fillonin bisedimet e para-anëtarësimit me Ukrainën ndërsa ajo po mbrohet nga agresioni rus, por tani edhe ata e mbështesin idenë.

Në ditën e 120 të luftës, Rusia hodhi të gjitha forcat e saj për të kapur Severodoneck dhe Lisiçansk dhe për të rifilluar ofensivën nga Izjum në Sllavjansk. Në të njëjtën kohë, forcat ukrainase janë tashmë 7 km larg nga qyteti Herson dhe përsëri sulmuan me sukses nga ajri objektet ruse në Ishullin kyç të Gjarpërinjve në Detin e Zi, njofton UNIAN.