Pavarësisht ndërprerjes së furnizimit me gaz për Bullgarinë nga Gazprom, vendi ynë nuk ka asnjë problem me furnizimet. Këtë e bënë të ditur në një konferencë të përbashkët për shtypin Kryeministri Kirill Petkov dhe Zëvendëskryeministri Asen Vasilev, bashkëkryetarë të partisë “Po e vazhdojmë ndryshimin”. Ata thanë se Bullgaria nuk do të përmbushë asnjë kërkesë jashtë kontratës së furnizimit të gazit me “Gazprom Export”. Petkov shtoi se si një masë përgjegjëse për shkeljen e njëanshme të kontratës së furnizimit me gaz nga Rusia, Bullgaria tashmë po shqyrton të gjitha kontratat ekzistuese për transitin e gazit rus. Ai siguroi se tranziti ende nuk është ndalur. Sipas tij, gazi u ndal fillimisht në Poloni, Bullgari dhe Lituani, pasi u erdhi radha të paguajnë sipas kalendarit.

Zëdhënësi i Kremlinit Dmitrij Peskov tha se nëse Bullgaria dhe Polonia bien dakord të paguajnë në rubla për gazin natyror rus sipas sistemit të ri, furnizimet me to do të rifillojnë, transmetoi korrespondenti i BNR-së në Moskë Angell Grigorov.