Presidenti ukrainas Volodimir Zelenski i bëri thirrje OKB-së të “veprojë menjëherë” ose “të shpërbëhet plotësisht” gjatë një fjalimi në të cilin tregoi pamje tronditëse të kufomave - përfshirë fëmijë – të cilët sipas tij janë viktima të ushtrisë ruse. Zelenski i bën thirrje Këshillit të Sigurimit të dëbojë Rusinë “në mënyrë që ajo të mos bllokojë vendimet për agresionin e saj”.

Ministri i Jashtëm rus Sergej Llavrov tha se viktimat në Buça janë një “provokim” që synon të pengojë bisedimet midis Moskës dhe Kievit.

Kina nuk është indiferente ndaj monitorimit të situatës në Ukrainë ose ndaj “shtimit të benzinës në zjarr”, tha përfaqësuesi i përhershëm i Pekinit në OKB Çzhan Czjun. “Ne sinqerisht duam paqe. Kina do të vazhdojë të avancojë bisedimet e paqes dhe do të luajë një rol konstruktiv për të ndihmuar në zgjidhjen e krizës në Ukrainë”, tha diplomati.

Shtetet e Bashkuara po ndajnë 100 milionë dollarë shtesë për sistemet antitank për Ukrainën, tha Sekretari i Shtetit Antëni Blinken. Estonia i dorëzoi Ukrainës raketa antitank, topa, mina dhe obusë, armë automatike, granatahedhës dhe municione, njoftoi Ambasada e Estonisë në Kiev. Çekia dërgoi tanke dhe automjete të blinduara në Ukrainë, raportoi Reuters.

BE do të shpallë paketën e pestë të sanksioneve kundër Rusisë. Kufizimet e reja përfshijnë ndalimin e importeve të qymyrit rus, ndalimin total të transaksioneve me katër banka ruse, mbylljen e porteve evropiane për anijet ruse, ndalimin e kompanive ruse të marrin pjesë në prokurimet publike në BE dhe kufizime shtesë në eksportet për Rusinë.

Agjencia e Kombeve të Bashkuara për Migracionin vlerëson se më shumë se 11 milionë njerëz u larguan nga shtëpitë e tyre në Ukrainë që nga pushtimi rus. Më shumë se 7.1 milionë prej tyre janë të zhvendosur në Ukrainë.