"Fluturimi i kulturës bullgare nëpër botë" do të mbledhë talente muzikore bullgare nga disa shtete. Ngjarja është planifikuar për 23 majin në orën 6 pasdite, kohë bullgare, në prag të festës më të dashur nga bullgarët - Dita e Vëllezërve të Shenjtë Kirill dhe Metodij, e alfabetit dhe e kulturës bullgare dhe e letërsisë sllave.
"Më 24 maj ne festojmë bukurinë e gjuhës sonë dhe fluturimin e kulturës amtare në të gjithë botën. Sot bota është lehtësisht e arritshme, botëkuptimi njerëzor është i gjerë dhe prania jonë në botë na jep mundësinë të jemi një lloj ambasadorësh të gjuhës dhe kulturës bullgare ", thanë organizatorët e aktivitetit. Kjo është arsyeja se pse ata kanë ftuar në programin e festave "si bullgarë të talentuar, kështu dhe njerëz që kujdesen për ruajtjen dhe përhapjen e famës se folklorit, teatrit, poezisë dhe prozës sonë në tërë botën".
Me interpretime dhe mesazhe muzikore do të përfshihen dhe muzikanti, aktori dhe këngëtari i njohur bullgar Dobrin Vekillov-Doni, saksofonisti Vlladimir Kërparov nga Gjermania, Kristina Zheçkova – bullgare besarabe, e lindur në Ukrainë, harpistja Cvetelina Likova dhe të tjerë. Kallojan Bukovski nga Londra na tregoi më shumë për kauzën që i bashkon:
"Ngjarja zgjat dy javë, në kuadrin e të cilave do të jetë aktive edhe fushata bamirëse që po mbështesim. Kauza është e Fondacionit “Së bashku në klasë”, e cila synon të krijojë një metodologji arsimore falas për fëmijët dygjuhësh. Këtu përfshihen si fëmijët në Bullgari, gjuha amtare e të cilëve nuk është bullgarishtja, ashtu dhe fëmijët bullgarë jashtë vendit që rriten në një mjedis ku flitet në gjuhë të huaj. Duke pasur parasysh se ka mbi 2 milion bullgarë në mbarë botën - emigrantë ose pjesë e komuniteteve historike, unë mendoj se këto instrumente arsimore që mund të përshtaten me mjedisin përkatës kulturor dhe arsimor do të përhapen gjithnjë e më shumë".
Projekti i fondacionit "Së bashku në klasë" realizohet në bazën e një tjetri, zbatuar në kuadër të programit Erasmus + i cili synon krijimin e materialeve në ndihmë të mësimit ë gjuhës bullgare në klasën e parë. Qëllimi i kësaj fushate bamirëse është që të bashkëpunojë në përgatitjen e materialeve që mbështesin arsimin e klasës së dytë. Ato do të përfshijnë një sistem lojërash gjuhësore, të kombinuara me udhëzime të hollësishme për zbatimin e tyre, të ilustruara mjaftueshëm dhe me materiale shtesë audio dhe video.
Për ta mbështetur këtë kauzë, koncerti "Fluturimi i kulturës bullgare nëpër botë" do të përfshijë bullgarë nga 12 qytete në 8 vende të tre kontinenteve, vuri në dukje organizatori Kallojan Bukovski. Ai vetë punon si analist në sektorin financiar, por kjo nuk e ndalon për të zhvilluar një veprimtari aktive shoqërore. Si drejtor i një platforme për artin dhe shkencën për bullgarët në territorin e Britanisë së Madhe - "Bullgarët e kohës së re", ai organizoi shumë ngjarje që synonin bashkimin e komunitetit bullgar në Mbretërinë e Bashkuar.
Ne meritojmë të kemi disa ditë në vit për të kujtuar se sa të vlefshëm jemi për botën," tha Kallojan Bukovski me rastin e Ditës së Vëllezërve të Shenjtë Kirill dhe Metodij - 24 maj, një festë unike e cila nderon arsimin, kulturën dhe shkrimin sllav .
Përgatiti në shqip: Vesella Mançeva
Foto: bgnovovreme.com
Që nga viti 2019, në Varna funksionon një shkollë, qëllimi i së cilës është të kapërcejë stereotipat dhe idenë e grafitit si diçka e shëmtuar, e ndyrë dhe e pakuptueshme. I ngjashëm, natyrisht, është edhe qëndrimi ndaj piktorëve të grafitit, të cilët..
Interpretuesit e vallëzimeve klasike indiane do të zhytin Burgasin në ritmin e kulturës indiane më 14 gusht në orën 20:30 në skenën e hapur "Kërmilli" në Kopshtin e Detit, njoftoi Bashkia e Burgasit. Programi Rasa-Nishpatti përmban..
Ekspozita e përbashkët “Dialogu” e Kënço Kënev dhe Valeri Llazarov me koreanen Çoi Xhi Yn prezantohet në Galerinë e Arteve në Ruse. "Bota ndjen një nevojë të madhe për dialog dhe tolerancë. Në këtë mjedis të tensionuar ndërkombëtar, njerëzit..
Për shkak të interesimit të madh për ekspozitën “Deçko Uzunov. Krijesat. 125 vjet nga lindja e piktorit” Galeria e Arteve të qytetit të Sofjes e zgjati..