Kryeministri Bojko Borisov u takua me Ambasadoren e Rusisë në Bullgari Eleonora Mitrofanova në lidhje me fillimin e mandatit të saj në Sofje. Gjatë bisedimeve të tyre në Këshillin e Ministrave, u diskutuan marrëdhëniet dypalëshe dhe ekzistenca e një dëshire nga të dy palët për t’i thelluar ato në një frymë vullneti të mirë dhe pragmatizmi, informoi qendra qeveritare e shtypit.

Nga qendra nuk informojnë nëse gjatë bisedimeve u prek tema e gjashtë personave të akuzuar në Bullgari për spiunazh në favor të Moskës. Nuk ka informacion nëse reagimi i Rusisë është diskutuar, pasi dje Bullgaria shpalli dy diplomatë rusë persona non grata.

Kryeministri Bullgar i uroi Ambasadores Mitrofanova një mandat të suksesshëm në Bullgari dhe vuri në dukje potencialin serioz për bashkëpunim në fushën e ekonomisë dhe tregtisë. Sipas tij, Bullgaria dhe Rusia mund të zhvillojnë partneritet të suksesshëm në një numër fushash si kultura, turizmi dhe bujqësia.