“Inovacionet dhe të Rinjtë” është resori, për të cilin do të përgjigjet komisionerja bullgare Maria Gabriel në përbërjen e re të Komisionit Evropian. Deri tani ajo ishte përgjegjësja për politikën evropiane të lidhur me ekonominë dhe shoqërinë digjitale. “Në të ardhmen bullgarja do të krijojë perspektiva për brezat e rinj me portofol në fushën e inovacioneve dhe të rinjve”, tha Kryetarja e Komisionit Evropian Ursila von der Leyen.

Deputeti bullgar në PE nga Partia Popullore Evropiane Andrej Kovaçev komentoi se “Inovacionet dhe të Rinjtë” është resori i së ardhmes dhe në të janë përfshirë arsimi dhe kultura. Në kuadrin e tij zhvillohen programet “Erasmus”, “Evropa Kreative”, “Horizonti 2020” etj. Gjatë periudhës së re programore për këto programe do të përdoren mbi 100 mlrd. euro, shpjegoi Kovaçevi.

Deputeti bullgar nga Partia e Socialistëve Evropianë Petër Vitanov shpjegoi se resori “Inovacionet dhe të Rinjtë” është varianti më i mirë (më parë jo zyrtarisht komentohej se Maria Garbriel do të jetë në krye të “Arsimit dhe Kulturës”), sepse arsimi është në duart e vendeve anëtare të BE-së dhe rregullat e përbashkëta evropiane në këtë fushë janë tepër të kufizuara. Tani PE-ja duhet të miratojë tërë përbërjen e propozuar të KE-së, por para kësaj kandidatët do t’u përgjigjen pyetjeve në komisionet përkatëse parlamentare.