Sot, më 3 mars, shënojmë Festën Kombëtare të Bullgarisë. Mbushen 139 vjet nga Çlirimi i shtetit tone nga sundimi pesëshekullor osman. Në këtë ditë më 1878-ën është nënshkruar Traktati i Shën-Stefanit ndërmjet Perandorisë Ruse dhe Perandorisë Osmane – dokumenti, i cili i dha fund Luftës Ruso-Turke (1877-1878), e njohur tek ne si Lufta Çlirimtare. Me të u njoh humbja e Perandorisë Osmane dhe u vunë themelet e Shtetit të Tretë Bullgar. Bullgaria u bë një shtet autonom, mirëpo vasal i Perandorisë Osmane, me kufij, të cilët përfshijnë pothuaj të gjitha territoret në pjesën evropiane të Perandorisë, të populluara me bullgarë. Sipërfaqja e saj e atëhershme është më se 170 mijë kilometra katrore. Bullgarisë i janë dhënë një varg të drejtash, duke përfshirë të drejtën që ajo të kërkojë njohjen e saj nga shtetet, të cilat nuk e kanë nënshkruar Traktatin e Shën-Stefanit. Ajo fitoi gjithashtu të drejtën që të ketë ushtri dhe polici të vet dhe të zhvillojë marrëdhënie të pavarura ndërkombëtare në fushën e tregtisë. Traktati i Shën-Stefanit ia dha Bullgarisë idealin për unitet kombëtar. Data e nënshkrimit të tij në vazhdim të dhjetëra viteve është shënuar si festë zyrtare. Në vitin 1990 me një vendim të Këshillit Shtetëror dhe të Kuvendit data 3 mars u shpall për Festën Kombëtare. Sot përvjetori i njëqind e tridhjetë e nëntë nga Çlirimi i Bullgarisë festohet me ceremoni të ndryshme në tërë shtetin.