Presidenti i Bankës Botërore Robert Zoellick: “Qeveria bullgare ka arritur shumë gjatë vitit të fundit”

botuar më 10-08-11 11.08.PD

Foto: BGNES

Presidenti i Bankës Botërore Robert Zoellick dhe kryeministri Bojko Borisov nënshkruan një marrëveshje për aktivizimin e bashkëpunimit për zhvillim të infrastrukturës në Bullgari. Banka Botërore do ta ndihmojë vendin tonë me ndihmë ekspertësh, që të mund t’i përvetësojë Bullgaria më shpejt mjetet evropiane. Ajo do të ndjekë se çfarë planesh ka vendi ynë në momentin e tanishëm dhe çfarë do të jetë ndikimi i tyre mbi deficitin e vendit, kështu qe qeveria të marrë vendimet e drejta.

“Bullgaria ka një mundësi të shkëlqyeshme për të përfituar maksimalisht nga fondet evropiane dhe të rimëkëmbë rritjen e saj ekonomike”, komentoi presidenti i Bankës Botërore. “Tani qeveria bullgare gjendet para sfidës së rëndë të rimëkëmbë vendin dhe ndërkohë të zhvillojë reforma strukturore, të shënojë rezultate të qëndrueshme fiskale dhe të realizojë integrim më të plotë në BE”, shtoi Robert Zoellick.

“Kryeministri dhe ekipi i tij kanë arritur shumë gjatë vitit të fundit në fushën e luftimit të kriminalitetit të organizuar dhe të korrupsionit, si dhe në respektimin e ligjit – deklaroi para gazetarëve pas nënshkrimit të marrëveshjes Robert Zoellick. – Qeveria po zbaton një buxhet me shumë sfida, në një periudhë krize ekonomike. Infrastruktura është jashtëzakonisht e rëndësishme për zhvillimin e ardhshëm të vendit. Diskutuam se si mund ta përkrahim vendin për arritjen e një rritjeje të mirë ekonomike. Shënuam se duhet të përballohet korrupsioni dhe të ndërtohet në mënyrë cilësore. Në bujqësi ka një potencial të madh. Kryeministri ka një ekip të shkëlqyeshëm, gjë që i bën përshtypje botës.”

Presidenti i Bankës Botërore vlerësoi pozitivisht faktin se Bullgaria arrin të mbajë deficitin buxhetor në një nivel relativisht të ulët, sidomos në krahasim me deficitet në plan botëror. Përveç kësaj vendi ynë ka një borxh të vogël të jashtëm – vetëm 15 për qind prej prodhimit të brendshëm bruto, gjersa në SHBA për shembull ai është 60 për qind. Rekomandimi i Robert Zoellick ndaj qeverisë ishte për të mbajtur besimin e shoqërisë ndaj tyre dhe për rritje të vëllimit të investimeve në vend.

Në nënshkrimin e marrëveshjes ishte e pranishme komisarja evropiane Kristalina Georgieva, ish zëvendës presidente e Bankës Botërore. Ajo ishte kategorike se Bullgaria duhet të përshpejtojë përvetësimin e resurseve nga fondet evropiane dhe të deklarojë nevojat e saj për periudhën tjetër financiare.

“Në periudhën e krizës ekonomike është jashtëzakonisht e rëndësishme për Bullgarinë që të përdorë të gjitha mundësitë e rritjes ekonomike, duke përvetësuar maksimalisht fondet evropiane – deklaroi komisarja evropiane Kristalina Georgieva. – Ne disponojmë afro 10 miliardë euro në fonde, të cilat duhet të përvetësojmë në vazhdim të tre viteve. Këto mjete janë të Bullgarisë, kurse ne nuk kemi përdorur madje 10 për qind prej këtij resursi financiar.”

Kryeministri Bojko Borisov komentoi nënshkrimin e marrëveshjes kështu: “Kur presidenti i Bankës Botërore i jep një vlerësim të tillë një kabineti, kryeministrit, si dhe ministrave të veçantë për punën e tyre në një periudhe krize dhe angazhohet për ta ndihmuar vendin me ekspertë, e gjithë kjo nuk mund të mos shihet nga komuniteti botëror dhe të mos bëhen përfundimet përkatëse. Një vlerësim pozitiv kishte dhe në raportin e departamentit të SHBA-së, të Komisionit Evropian, kështu qe vullneti ynë politik dhe dëshira jonë që të jemi korrektë në përvetësimin e fondeve evropiane dhe të tërheqim më shumë investime vlerësohet në një mënyrë të denjë. Shpresoj që me ndihmën e ekspertëve të Bankës Botërore t’i përvetësojmë këto 10 miliardë euro nga fondet evropiane.”

Për periudhën nga aderimi i Bullgarisë me grupin e Bankës Botërore në vitin 1990 deri tani shuma e përgjithshme e përkrahjes financiare për vendin kap shumën afro 4 miliardë dollarë amerikanë. Ajo është destinuar për sektorë të ndryshëm si sfera bankare, shëndetësia, ruajtja e mjedisit, politika sociale, industria, biznesi agrar, infrastruktura etj. Aktualisht Banka Botërore bashkë me qeverinë është duke përpunuar një strategji të re për partneritet me Bullgarinë për periudhën 2011 – 2014.

Përgatiti në shqip: Vesella Mançeva

По публикацията работи: Tanja Harizanova

Последвайте ни и в Google News Showcase, за да научите най-важното от деня!

Ndaje

Presidenti i Bankës Botërore Robert Zoellick: “Qeveria bullgare ka arritur shumë gjatë vitit të fundit”

Më shumë nga rubrika

Pas përditësimit të të dhënave, PBB-ja e Bullgarisë për vitin 2023 po rritet

Bullgaria është e 52-ta në mesin e 165 vendeve për sa i përket lirisë ekonomike

Statistikat tregojnë një rënie të mprehtë të inflacionit vjetor në vend