Politika sociale gjatë vitit të parë të qeverisjes së GERB-it

botuar më 10-07-14 11.30.PD

“Qeveria arriti të bëjë gjithçka të mundur që të mos pakësohen rrogat, pensionet dhe ndihmat sociale në kushtet e krizës, si edhe të mos rriten tatimet” – deklaroi ministri i punës dhe politikës sociale Totju Mlladenov

Foto: BGNES

Veprimet në fushën e politikës sociale gjatë vitit të parë të mandatit të qeverisë së GERB-it ishin përqendruar në kufizimin e papunësisë, rritjen e punësimit, mbrojtjen më efektive sociale të punonjësve dhe fillimin e bisedimeve për reformim të sistemit të pensionimit në Bullgari. Viti ishte shumë i rëndë për shkak të krizës ekonomike dhe financiare, e cila preku shumë bullgarë dhe biznesin. “Megjithatë qeveria arriti të bëjë gjithçka të mundur që të mos pakësohen rrogat, pensionet dhe ndihmat sociale në kushtet e krizës, si edhe të mos rriten tatimet – tha ministri i punës dhe politikës sociale Totju Mlladenov. – E arritëm këtë në saje të dialogut aktiv me partnerët socialë gjatë vitit të fundit.”

Si rezultat i këtij dialogu me sindikatat dhe punëdhënësit u miratuan dy paketa masash antikrizë, të cilat e mbështetën biznesin që të ndërpresë shkurtimin e vendeve të punës. Këto masa stimuluan dhe po vazhdojnë të stimulojnë tregun e punës, duke krijuar dhe mundësi për rritjen e kualifikimit të kuadrove. E gjithë kjo ndali rritjen e papunësisë, theksoi Totju Mladenov.

“Me dialogun aktiv në Këshillin kombëtar për bashkëpunim trepalësh, me paketat e masave antikrizë arritëm të ndalim rritjen e papunësisë, pika më e lartë e së cilës ishte gjatë muajit shkurt të këtij viti – me 10,26% të papunë nga popullsia aktive e vendit – shtoi ministri i punës. – E ndërpremë tendencën e rritjes graduale të papunësisë, e cila vazhdoi nga dhjetori i vitit 2008 deri më shkurt të vitit 2010. Gjatë të katër muajve të fundit papunësia u ul me 1% dhe tani është 9,26%.”

U ndërmorën masa dhe për mbrojtjen e të drejtave të punonjësve. Në kohën e krizës një pjesë e madhe prej tyre hyjnë në ekonominë ilegale dhe punojnë pa kontrata punësimi dhe pa sigurime. Kështu humbasin edhe punonjësit, edhe buxheti. Në tërë vendin bëhen kontrollime nga Kryeinspektorati i punës, Instituti kombëtar i sigurimeve, Agjencia kombëtare e të ardhurave për t’i kthyer punonjësit në sistemin e sigurimit social. Vetëm gjatë ditëve të fundit u konstatuan 240 raste të punonjësve pa kontrata punësimi me punëdhënësit. Gjoba për punëdhënësin është 15 mijë leva (ose 7 500 euro). “Kontrollimet do të vazhdojnë, madje po të duhet të përfshihem dhe unë në to” – siguroi ministri Mladenov. Deficiti në Institutin kombëtar të sigurimeve i detyrohet pikërisht mospagimit të sigurimeve sociale, të cilat duhet të jenë baza financiare e pagimit të pensioneve. Kontrolli në këtë fushë do të bëhet edhe më i rreptë gjatë muajve të ardhshëm. Një pjesë e veprimeve të ministrisë gjatë vitit të kaluar ishte drejtuar në ndaljen e mashtrimeve me ndihmat për njerëzit me çrregullime. Agjencia e ndihmës sociale ia ka dërguar prokurorisë informatë për ndihma dhe pensione për njerëz me çrregullime, të cilët nuk kanë të drejtën t’i marrin, por i kanë marrë. Si rezultat i kontrollit shpenzimet janë pakësuar me afro 2 milionë leva (1 milion euro) në muaj.

Gjatë vitit të parë të qeverisjes së GERB-it filluan dhe bisedimet për reformim të sistemit të pensionimit në Këshillin konsultativ që u krijua nga ministri Totju Mladenov dhe në të cilin përfshihen ekspertë nga ministria, nga sindikatat dhe punëdhënës. Tendencat demografike negative kërkojnë stabilizim të sistemit të pensionimit dhe mënjanim të dobësive në të. Propozimet që parlamenti do të diskutojë deri në fund të këtij viti parashikojnë rritje të stazhit të punës, i cili do të bëhet për femrat 37 vjet dhe për meshkujt 40 vjet, kufizim të rasteve të pensionimit të herët, si edhe bonuse për ata që do të mbeten në punë, megjithëse e kanë stazhin e nevojshëm për pensionim.

Përgatiti në shqip: Ekaterina Tarpomanova

По публикацията работи: Millka Dimitrova

Последвайте ни и в Google News Showcase, за да научите най-важното от деня!

Ndaje

Politika sociale gjatë vitit të parë të qeverisjes së GERB-it

Më shumë nga rubrika

Bullgarët e vetëshpallur në Maqedoninë e Veriut janë shumë më tepër se ata të regjistruar

Si do të ndikojë në BE rezultati i zgjedhjeve presidenciale në SHBA

Nënpresidentja Ilijana Jotova hapi një ekspozitë për Trakinë e lashtë në Muzeun Getty

WWF Bullgaria i kushton vëmendje mbrojtjes së arinjve

Magji festive me këngë, valle dhe takime me Plakun e Krishtlindjeve në Qytezën e Festave të Fundvitit në Pleven

Gjimnazistë bullgarë në një betejë me dezinformimin