Në Bullgari ende ka mosbesim ndaj sistemit gjyqësor

botuar më 10-04-20 11.40.PD

Bullgaria vazhdon të jetë nën monitorimin e rreptë të Komisionit Evropian dhe të vendeve të partneritetit të NATO-s sa i përket përparimit të saj në reformën e sistemit gjyqësor dhe në luftimin e kriminalitetit të organizuar. “Drejtësi dhe rend i brendshëm” është fusha, për shkak të së cilës 3 vjet pas anëtarësimit të tij në BE vendi ende vëzhgohet sipas mekanizmit për bashkëpunim dhe kontroll. Gjatë muajit korrik të këtij viti pritet vlerësimi i radhës i Komisionit Evropian për përparimin e vendit. Mirëpo megjithë vullnetin politik dhe përpjekjet e qeverisë së re, sipas fjalëve të zëvendëskryeministrit dhe ministër i punëve të brendshme Cvetan Cvetanov, në shoqëri ende ka mosbesim ndaj sistemit gjyqësor. Ai e shënoi këtë pas një takimi me Këshillin e lartë gjyqësor gjatë javës së kaluar, qëllimi i të cilit ishte gjetje e mekanizmave ligjore për heqjen e magjistratëve dhe shefave të korruptuar nga sistemi gjyqësor. Sipas kushtetutës ai është i pavarur dhe pushteti ekzekutiv nuk mund të ushtrojë ndikim mbi të.

Në raportin e tij të fundit nga muaji korrik i vitit të kaluar Komisioni Evropian i rekomandoi qeverisë bullgare 22 masa, që ta përfundojë reformën në sistemin gjyqësor dhe të luftojë krimin e organizuar dhe korrupsionin në etazhet e larta të pushtetit. Në përgjigje të kësaj prokuroria dhe Ministria Bullgare e Punëve të Brendshme ndërmorën një sërë operacionesh kundër strukturave kriminale për rrëmbime, vjedhje të TVSH-së dhe mashtrime të tjera financiare me emrat “Arrogantët” – 1 dhe 2. Pastaj erdhi dhe operacioni më i rëndësishëm “Oktapod”, në të cilin u arrestua dhe nëpunësi i lartë i Agjencisë Shtetërore të Sigurisë Kombëtare Aleksej Petrov, i cili u akuzua për lidhje me kriminalitetin e organizuar dhe për emërim të paligjshëm kuadrosh në nivelet më të larta të pushtetit. Erdhi radha e operacionit “Të paprekurit” kundër mafisë energjetike. Pikërisht ky operacion vazhdon të mirëmbajë rejtingun e lartë të qeverisë, megjithë krizën e rëndë. Kriminaliteti dhe korrupsioni në etazhet e larta të pushtetit shënohen nga bullgarët si një prej problemeve kryesore në shtet. Një prej qëllimeve të takimit të Cvetan Cvetanovit me Këshillin e lartë gjyqësor ishte pikërisht përshkrimi i disa prej rasteve të kontakteve jo të reglamentuara të gjyqtarëve me banditët. Për rastin e gjyqtarit të arrestuar Petër Santirov nga Gjykata Civile e Sofjes për dyshime se ka qenë ndërmjetës në dhënie ryshfeti një hetuesi nga Hetimi kombëtar, ministri Cvetanov saktësoi:

“Vetë fakti se lejimi për përdorim mjetesh speciale hetimi për të nuk ishte marrë nga Sofja, por nga një gjyq tjetër në vend flet se ka probleme në sistem, si dhe mosbesim ndaj veprimeve tona konkrete. Është shumë vështirë të vërtetohet pjesëmarrja e gjyqtarëve dhe prokurorëve në një grup të veçantë kriminal. Sa për kontingjentin kriminal dhe personat e lidhur me një grup kriminal, situata është më e lehtësuar.”

Mosbesim ndaj Këshillit të lartë gjyqësor shprehu publikisht dhe ambasadori i SHBA-së te ne Xhejms Uorlik pasi u takua me kryeprokurorin e Bullgarisë Boris Vellçev. Sipas fjalëve të tij në vend ka gjyqtarë të korruptuar. “Duhet të dini se si ta përballoni problemin, sepse bota ju vëzhgon”, deklaroi kategorikisht ai. Qeveria tashmë ndërmori disa hapa të rëndësishëm. Pritet votim në lexim të dytë në Kuvendin Popullor i ndryshimeve në Kodin e procedurës penale. E reja është se aplikohet i ashtuquajturi “mbrojtës rezerve”, në qoftë se avokati i të akuzuarit nuk vjen në gjyq pa shkaqe të arsyeshme, si dhe mundësia të ketë dënim vetëm mbi bazën e provave, të grumbulluara me mjete të posaçme hetimi dhe nga një dëshmitar anonim (për të akuzuarit, por jo për gjyqtarin). Ka dhe vullnet politik për ndryshime të ligjit për pushtetin gjyqësor dhe për mjetet e posaçme të hetimit.

Përgatiti në shqip: Vesella Mançeva

По публикацията работи: Tatjana Obretenova

Последвайте ни и в Google News Showcase, за да научите най-важното от деня!

Ndaje

Në Bullgari ende ka mosbesim ndaj sistemit gjyqësor

Më shumë nga rubrika

WWF - Bullgaria nis fushatën e donacioneve "Abonohu për natyrën"

Bullgarët e vetëshpallur në Maqedoninë e Veriut janë shumë më tepër se ata të regjistruar

Si do të ndikojë në BE rezultati i zgjedhjeve presidenciale në SHBA

Pse disa nga rrugët e Pragës mbajnë emrat e iluministëve bullgarë?

WWF Bullgaria i kushton vëmendje mbrojtjes së arinjve