Studentët nga Universiteti i Sofjes ishin mysafirë të Radio Bullgarisë

"Studentët janë të vitit të parë dhe të pestë të degës së Ballkanistikës. Studentët e vitit të parë tani po i futen gjuhëve të huaja edhe studimeve ballkanike, ndërsa të tjerët janë në fund të studimeve. Përveç gjuhëve ballkanike ata bëjnë edhe trajnime teorike në fusha të ndryshme – histori, letërsi, gjuhësi teorike – shpjegon drejtuesja e departamentit, Prof. Asoc. Ekaterina Tërpomanova, sipas së cilës Radioja Kombëtare Bullgare mund të jetë një vend i përshtatshëm për zhvillimin e karrierës së specialistëve të rinj. "Do të isha shumë e lumtur nëse do të organizonim edhe praktika në të ardhmen. Sot ishte shumë interesante për të gjithë dhe ideja ime për të bërë këtë vizitë tek ju ishte që ata të kenë parasysh se dega e tyre është mjaft e përshtatshme për realizim në fushën e gazetarisë, përveç në pjesën e përkthimit, ku Radio Bullgaria ofron mundësi të mëdha. Studentët tanë kanë një përgatitje të shkëlqyer në lidhje me historinë e Ballkanit, kulturën, folklorin, d.m.th gjithçka që studiojnë në këtë degë është shumë e përshtatshme për një realizim të tillë."

Për studentët, kalimi i pragut të institucionit të Radios Kombëtare Bullgare ishte vërtet emocionues. Disa mbetën të befasuar kur zbuluan se sa e madhe është në të vërtetë "Shtëpia e Vjetër", siç e quajmë ne radion. "Veprimtaria e radios është më e madhe nga sa e kisha imagjinuar”, na tha Petër Zorovski.

Pas vizitës në redaksinë shqiptare dhe greke, ku patën mundësinë të bisedonin me përfaqësues të ekipeve, studentët ishin prezentë edhe në regjistrimin e programit në gjuhën shqipe. Disa prej tyre praktikuan njohuritë e tyre në gjuhën ballkanike duke iu përgjigjur pyetjeve të koleges tonë Kostandina Bello.

"Kisha dëgjuar për Radio Bullgarinë, jam futur disa herë në faqen online, por nuk e kisha parë me shumë imtësi. Tani që u njoha më shumë me veprimtarinë e radios, redaksisë shqiptare, mbase do ta vizitoj më shpesh për të ndjekur lajmet." – ndan Georgi Atanasov.

"Dega jonë është e lidhur me mësimin e gjuhëve dhe Radio Bullgaria mund të jetë një fillim i mirë i karrierës tonë. Aktualisht po mësoj rumanisht, së shpejti shqip dhe greqisht, gjë që është mjaft interesante për ne. Kam miq nga Greqia që janë shumë kurioz të mësojnë për Bullgarinë, na pret një takim intrigues në pranverë”- na thotë studentja e vitit të parë..., e cila tha me bindje se do t'ua prezantonte miqve të saj nga shteti fqinj faqen greke të Radio Bullgarisë.

Foto: Elena Karkallanova

Përgatiti në shqip dhe publikoi: Kostandina Bello