Një protestë e konsumatorëve nën sloganin "Pesë minuta heshtje paralajmëruese", e organizuar nga platforma "Alo, Inspektor", u zhvillua më 20 shkurt para selisë së Bankës Kombëtare Kroate. Protesta të ngjashme u zhvilluan në 20 qytete të tjera kroate, njoftoi televizioni kombëtar HRT. Pakënaqësia është shkaktuar nga rritja e çmimeve të mallrave dhe shërbimeve, inflacioni më i lartë në BE, mosveprimi i Bankës Kombëtare Kroate dhe autoriteteve shtetërore, lakmia e bankave dhe operatorëve të telekomunikacionit, si dhe varfëria dhe padrejtësia sociale, shpjegojnë organizatorët. Sipas mediave kroate, shumë qytetarë preferojnë të udhëtojnë drejt Sllovenisë dhe Italisë për pazar, ku çmimet për disa mallra janë më të ulëta.

Ka filluar ndërtimi i gazsjellësit të ri Greqi-Maqedonia e Veriut. Kompania Terna po punon për aktivitetet paraprake në pjesën greke të projektit, raporton portali grek informativ “Energy Mag”, cituar nga BGNES. Buxheti i Operatorit Kombëtar të Transmetimit të Gazit të Greqisë DESFA për gazsjellësin /Nea Mesimvria - Gjevgjeli/ është 92 milionë euro. euro. Projekti pritet të përfundojë në pranverën e vitit 2026. "Do të ndërtohet një gazsjellës i tërë, i cili do të kalojë nga Greqia përmes Maqedonisë dhe Serbisë në Hungari, Austri dhe Evropën Qendrore. Do të përfundojë projekti që e kanë përmendur brezat e politikanëve para nesh. Me këtë Maqedonia do të zërë një vend qendror në furnizimin me gaz në Evropën Qendrore”, tha zëvendëskryeministri dhe ministri i Transportit i Maqedonisë së Veriut, Aleksandar Nikoloski në shtator 2024.

Një sondazh i vitit 2024 për kënaqësinë nga jeta, i kryer nga Instituti i Statistikave Turke, tregoi se 49.6% e turqve ishin të lumtur. 14.5% e të anketuarve ndiheshin të pakënaqur.

I njëjti studim tregon se problemi më serioz për njerëzit në vend në vitin 2024 ishte rritja e kostos së jetesës. Kështu mendojnë 29.2% e të anketuarve. Në vendin e dytë renditen problemet në sistemin arsimor – ato kryesojnë për 15,7% të të anketuarve. Varfëria është në vendin e tretë – nga 14% e të anketuarve.

Pritet që deri në vitin 2026 të ndërtohet një linjë hekurudhore e shpejtë, nëpërmjet së cilës nga Beogradi në Budapest do të arrihet vetëm për 2 orë e 40 minuta. Linja do të jetë e gjatë 350 km. Kjo u bë e qartë pas takimit të presidentëve të Serbisë dhe Hungarisë - Aleksandar Vuçiq dhe Tamash Shujok në Budapest, njoftoi TANJUG. Lidhja do të shërbehet nga 9 trena të prodhuar nga kompania kineze CRRC Changchun Railway Vehicles. Sipas Vuçiqit, linja Beograd-Budapest do të jetë më e mira në të gjithë Evropën dhe do të nxisë turizmin mes dy vendeve.

Përpiloi: Miglena Ivanova

Foto:adevarul.ro, vijesti.hrt.hr, republika.mk, tr.investing.com, makronom.eu

Përgatiti në shqip dhe publikoi: Kostandina Bello