Sa do të kushtojë tryeza e Pashkëve për bullgarët këtë vit?

botuar më 24-04-26 7.30.PD

Foto: БТА

Më thuaj çfarë ke në tavolinë që të të them se çfarë je duke festuar. Kështu, me shaka mund të shikojmë kalendarin bullgar të festave nga e kaluara deri në ditët e sotme. E vërteta është se tryeza ka qenë gjithmonë një element shumë i rëndësishëm i jetës dhe festave tona. Pashkët nuk përbëjnë përjashtim. Ndërsa këtë vit festa e madhe e krishterë bie edhe në prag të ditës së Shën Gjergjit, e festuar nga bullgarët më 6 maj dhe përshtatet edhe me traditat e gatimit.

"Tryeza e Pashkëve tradicionalisht përmban kozunak, mish qengji dhe sallatë me perime - me marule, domate dhe kastraveca, dhe vezë të lyera. Ne sigurisht nuk do të bëjmë kompromis dhe gjithçka që duhet të përgatitet do të blihet duke u privuar nga disa gjëra të tjera. Është shtrenjtë! Është shtrenjtë në krahasim me të ardhurat që marrim”, thotë për Radio Bullgarinë Denica e cila tashmë po bën një listë me produktet e nevojshme për tryezën e saj familjare më 5 maj.

Sa do të kushtojë tryeza festive në vitin 2024?

Me një siguri se ka një stabilizim të çmimeve dhe një ekuilibër të qëndrueshëm të tregut, Vlladimir Ivanov, kryetar i Komisionit Shtetëror për Shkëmbime Mallrash dhe Ankande, i tha BNR-së se ndoshta do të kemi të njëjtën vlerë çmimi të tryezës së Pashkëve si vitin e kaluar. Sipas tij, çmimet e produkteve ushqimore bazë, përfshirë frutat dhe perimet bazë, në gjysmën e parë të prillit janë pak më të lira në krahasim me periudhën e njëjtë të vitit të kaluar.

“Në përgjithësi, shporta e konsumit, nëse blejmë nga një gjë nga çdo lloj ushqimi, do të jetë rreth 108 leva. Për krahasim, vitin e kaluar ishte 111 leva. Rënia e çmimeve është e parëndësishme dhe thuajse e padukshme, nën 2%, por lajmi i rëndësishëm është se kemi një ekuilibër të qëndrueshëm të ndërveprimit dhe nuk ka tendencë që tregon se do të ketë ndonjë ndryshim drastik”, shpjegoi Vlladimir Ivanov. Ai shtoi se çmimi i sallatës është 16% më pak se atë në vitin e kaluar, vaji - me rreth 20%, vezët me rreth 5%. Pothuajse e njëjta gjë vërehet edhe te produktet e qumështit.

Çfarë po shohim në treg?

Çmimi i një kilogrami domate në Sofje (nga 15 prilli) është nga 3 deri në 8 leva (1,54 - 4,1 euro), kastravecat shiten nga 2,50 në 4,90 leva (1,28 - 2,51 euro), një sallatë/marule nga 1,20 deri në 1,80 leva (0,61-0,92 euro), një tufë rrepash 1,50 deri në 2,70 leva (0,77 - 1,38 euro), një tufë qepë të njoma nga 1,30 në 2,90 leva (0,67 - 1,48 euro) për prodhim bio.

Korrespondenti i BNR-së në Kjustendill Kirill Falin kontrolloi nëse situata është e ndryshme në rajone të tjera të Bullgarisë.

"Perimet bullgare janë shumë më të shtrenjta se ato të importuarat. Domatet bullgare janë nga 5,80 leva / 2,97 euro / kilogrami deri në 6,50 / 3,33 euro /. Të importuarat - turke, greke janë mesatarisht rreth 3 leva. Kastravecat - prodhimi bullgar dhe ato nga varieteti më i mirë "Gergana" shiten 5,50 leva / 2,82 euro/. Në zinxhirët e mëdhenj, pasi janë në shitje, ato janë më të lira. Thonë "kastraveca bullgare", por 2,99 leva / 1,53 EUR / nuk janë bullgare. Gënjejnë”, thotë një qytetar nga Dupnica.

Specat jeshil dhe të kuq – disa janë 6 /3,07 euro/, të tjerët - 7 leva / 3,58 euro/. Epo le t'i hanë vetë! Si qenka normale kjo – mishi i derrit shitet 7 leva për kilogram, dhe unë do të harxhokam lekët për speca. Histori e tmerrshme! Për Pashkë do të hamë mish qengji, nuk do të hamë perime. Do ta kemi për ditën e Shën Gjergjit të nesërmen. Ndërsa specat dhe domatet janë nga 10 leva le t’i hanë vetë”, thotë një burrë nga Kjustendilli, i acaruar nga çmimet e perimeve."

"Nuk ka çmim të drejtë. Ai formohet vullnetarisht nga kërkesa dhe oferta," shpjegon kryetari i Komisionit Shtetëror për Shkëmbime Mallrash dhe Ankande, Vlladimir Ivanov, dhe rekomandon që njerëzit të mos blejnë spontanisht dhe të bëjnë blerje të informuara për të mos u bërë pjesë e praktikave të këqija tregtare.

Por edhe pse bursa raporton një rënie minimale të çmimeve në krahasim me vitin e kaluar, bullgarët nuk e ndjejnë këtë në xhepat e tyre. Ndërsa me afrimin e festave, çmimet shpesh rriten.

“Si çdo vit ndjejmë rritje të çmimeve, sidomos për prodhimin vendas dhe konkretisht për domatet, diçka që e konsumojmë shumë rregullisht – tregon Martin nga Sofja. – Padyshim që çmimi përcakton cilësinë dhe prodhimi bullgar ka rezultuar të jetë më cilësor, por edhe çmimi i tij është të paktën dy herë më i lartë se produktet e importuara. Për të qenë i sinqertë, unë jam skeptik për etiketat e origjinës së produkteve në zinxhirët e mëdhenj të dyqaneve dhe e kam të vështirë të gjurmoj nëse ato janë vërtet nga Bullgaria, ose janë të importuara nga jashtë, por kam përshtypjen se cilësia është më e ulët atje, në krahasim me dyqanet më të vogla.“

A do të lyejmë prap vezë polake dhe jo bullgare si vitin e kaluar? Kjo varet nga ne. Vlladimir Ivanov apelon që për Pashkë të blejmë produkte bullgare për tryezën për t'i mbështetur prodhuesit vendas.

Fotot: BTA, BGNES, Emill Nikollov - BNR, Vanja Sllavova - BNR

Përgatiti në shqip dhe publikoi: Kostandina Bello

Последвайте ни и в Google News Showcase, за да научите най-важното от деня!

Ndaje

Sa do të kushtojë tryeza e Pashkëve për bullgarët këtë vit?

Më shumë nga rubrika

Eksploruesit polarë bullgarë dhe francezë tregojnë për sfidat në Antarktidë

Rajna Manxhukova: Dua që lufta të mos ndajë komunitetin bullgar të besarabëve në Ukrainë dhe Moldavi

Zgjedhjet përfunduan, në pritje të zgjedhjeve të tjera!

Bullgaria është e para në BE që realizoi inteligjencën artificiale të nivelit të lartë në gjuhën e saj

Ekipi i ri i Ursula von der Leyen: a do të arrihet një "marrëveshje paketë" për të miratuar të gjithë komisionerët e BE-së