Zhvillimi i turizmit në vendin tonë bëri që shumë bullgarë dhe të huaj të kërkojnë vende të qeta dhe të izoluara për të shpëtuar nga qytetet dhe pushimoret e mbipopulluara. Dhe mali Stranxha, i cili është ende i famshëm si një nga malet më të paeksploruara bullgare, ofron një sërë sfidash për njerëzit me një shpirt aventuresk dhe është vetëm 20 kilometra larg qytetit Burgas.

•  Stranxha është për eksplorues dhe njerëz me një shpirt aventuresk
•  Birrë me aromën e… malit Stranxha

Në Stranxha ruhet edhe një nga zakonet më të njohura të quajtura nestinarstvo (vallëzim me këmbë të zbathur mbi prush), karakteristikë e disa fshatrave atje. Për banorët vendas, folklori është i veçantë sepse “u jep atyre disa nga dhuratat më bujare - forcë, shëndet, dashuri dhe rehati”, siç thotë këngëtarja popullore Zllatka Stavreva në një intervistë për Radio Bullgarinë.

• Në Stranxha të gjithë këndojnë në harmoni me natyrën

E ndërsa njohësit e artit folklorik e njohin si “dallëndyshja e bardhë e Stranxhës”, mali mban të gjallë kujtimin e një këngëtareje tjetër legjendare – të paharrueshmes Magda Pushkarova – frymëzim dhe shembull për interpretuesit e sotëm të folklorit të krahinës Stranxha.

• Magda Pushkarova - magjistarja e malit Stranxha

E lindur 103 vjet më parë në qytetin Mallko Tërnovo, në një familje refugjatësh nga Trakia e Edrenesë, që në moshë të re ajo mësoi shumë këngë për heronjtë e Stranxhës Petko dhe Inxhe Vojvoda, për nestinarët... Në vitin 1951 ajo ishte mes këngëtarëve të parë, që u ftuan në Ansamblin e Këngëve dhe Valleve Popullore personalisht nga themeluesi i tij Filip Kutevi. Paralelisht incizoi mbi 100 këngë nga krahina e Stranxhës për fondin e Radios Kombëtare, si dhe shtatë pllaka të gramofonit me këngët e saj. Magda Pushkarova gjithashtu dha shumë koncerte në mbarë Bullgarinë. Para se të largohej nga kjo botë në vitin 2006, këngëtarja jetonte në shtëpinë e saj të lindjes në Mallko Tërnovo, e cila pas vdekjes së saj u shndërrua në Muzeun e këngës së krahinës së malit Stranxha.

Përpilues: Joan Kolev

Përgatiti në shqip dhe publikoi: Svetllana Dimitrova

Foto: strandja.bg, arkiv personal, Petër Papakoçev