Më shumë se pesëdhjetë prodhues prezantojnë produktet e tyre në Sandanski, në forumin e dytë bujqësor "Nga ferma në tryezën tënde", më 10 dhe 11 qershor. Veprimtaria e organizuar nga Drejtoria Rajonale e Bujqësisë (DRB) - Bllagoevgrad, nën patronazhin e Presidentit Rumen Radev, bashkon në një vend ushqimin dhe verën bullgare të cilësisë së lartë nga prodhuesit vendas, prezantimin e atraksioneve natyrore, kulturën dhe turizmin. Produktet prodhohen pothuajse në të 14 bashkitë e rajonit të Bllagoevgradit dhe janë të ekspozuara në parkun e qytetit "Shën Vraç" në Sandanski. Është planifikuar një program i pasur kulturor me një shfaqje kulinare, një koncert të Vlladimir Ampov - Grafa dhe Band, si dhe një shfaqje me drita nga Teatri i Zjarrit dhe i Hijeve "Fireter" në orët e vona të së shtunës në mbrëmje.

Përgatiti në shqip: Kostandina Bello