Bullgarët jashtë vendit - së bashku me bashkatdhetarët e tyre në vendin tonë, janë sërish përballë një zgjedhjeje, nga e cila varet nëse vendi ynë do të punojë për prosperitetin e qytetarëve të tij dhe nëse do të konsolidohet në familjen evropiane dhe euroatlantike si një partner i besuar.
Në Austri jetojnë nga 35 deri në 45 mijë bullgarë, nga të cilët vetëm 5 mijë votuan në zgjedhjet e fundit parlamentare. Megjithatë, statistikat e 2 tetorit 2022 mund të ndryshojnë, pasi sot janë në dispozicion 15 qendra votimi në tetë qytete.
“Për fat të keq, qëndrimi i bullgarëve në Vjenë nuk ndryshon nga zgjedhjet e fundit. Njerëzit duket se janë të lodhur nga zgjedhjet”, thotë Teodor Georgiev, një sipërmarrës sportiv dhe social që jeton në kryeqytetin austriak. Ai është një nga bullgarët aktivë jashtë vendit, i cili së bashku me bashkatdhetarët e tjerë shpreh hapur qëndrimin e tij. E megjithëse vitet e fundit “protesta” dhe “zgjedhje” janë ndër fjalët më të përdorura, vendi ynë është përballur sërish me probleme thelbësore, zgjidhja e të cilave duhej gjetur shumë kohë më parë.
“Problemet me korrupsionin dhe mungesën e sundimit të ligjit janë të rrënjosura thellë në politikën bullgare dhe, siç mund ta shohim, duhet kohë dhe përpjekje të vazhdueshme për të arritur një ndryshim të rëndësishëm - vazhdon Teodor Georgiev. - Ne ende nuk mund ta vizualizojmë, nuk mund ta ndiejmë, nuk mund ta prekim, prandaj është jashtëzakonisht e rëndësishme të vazhdojmë të bëjmë pyetje thelbësore dhe t’u kërkojmë përgjegjësi atyre në pushtet, pavarësisht se cilët janë ata. Progresi mund të jetë i ngadalshëm, por çdo hap drejt një shoqërie më transparente dhe demokratike është i rëndësishëm. Pa ndalur korrupsionin dhe pa arritur sundimin e ligjit, ne nuk mund të ecim me hapat që duam”.
Sociologët dhe analistët politikë nuk janë shumë optimistë, se mund të formohet një kabinet edhe pas këtyre zgjedhjeve. Ndryshimeve të shumta mes palëve u shtohet edhe një tjetër – në lidhje me qëndrimin e tyre për luftën në Ukrainë. Me këtë rast, Teodor Georgiev thekson:
"Është thelbësore të sigurohet që politika e jashtme e Bullgarisë të jetë në përputhje me interesat dhe vlerat e saj kombëtare, si dhe me ato të partnerëve të saj. Nuk duhet të harrojmë se Bullgaria është pjesë e shumë marrëveshjeve të jashtme politike dhe nuk e kuptoj se pse duhet të ketë diskutime mbi këto tema.”
Ndaj, sipas sipërmarrësit të ri, energjia politike duhet të fokusohet në mundësitë e zhvillimit që vendi ynë mund t'i ofrojë secilit qytetar.
"Qeveria e ardhshme duhet t'i japë përparësi rritjes ekonomike dhe drejtësisë sociale, si dhe qëndrueshmërisë në fushën e shëndetësisë, - tha Teodor Georgiev për Radio Bullgarinë. Pandemia e koronavirusit ka vënë në pah rëndësinë e investimeve në këtë fushë, por edhe në arsim, për të mbështetur grupet e pambrojtura. Përveç kësaj, është e nevojshme t’i kushtohet rëndësi në fushën e dixhitalizimit dhe të investohet në infrastrukturë për të mbështetur rritjen e sektorit të teknologjisë. Besoj se sektori teknologjik është shansi që Bullgaria të pozicionohet në hartën botërore me një produkt dhe shërbim të nivelit të lartë. Ne shohim se ka startup kompani në industrinë e teknologjisë me të cilat mund të krenohemi.”
Mirëpo, që e gjithë kjo të ndodhë, është e nevojshme që secili nga ne të japë votën e tij, është i bindur Teodor Georgiev.
Përgatiti në shqip: Kostandina Bello
Foto: arkiv personal
Diversiteti kulturor dhe gjuhësor – pikërisht kjo e dallon Bashkimin Evropian dhe gjuhët e folura në komunitet janë një pjesë e rëndësishme e trashëgimisë kulturore të Evropës. Ka 24 gjuhë zyrtare në BE dhe sa herë që në të anëtarësohen shtete..
Emrat e këtij Komisioni Evropian nuk janë më spekulime apo hamendje, por fakt. Struktura gjithashtu dhe ajo që është e qartë është se janë 6 nënkryetarë ekzekutivë por struktura e nënkryetarëve të zakonshëm është hequr. Siç pritej, secila prej..
Pas ditës së parë të shkollës për nxënësit në Bullgari - 15 shtator - vjen koha për të nisur vitin e ri shkollor edhe për studentët, pasi shumica e institucioneve të arsimit të lartë në vendin tonë hapin dyert më 1 tetor. Në këtë interval prej rreth dy..
Diversiteti kulturor dhe gjuhësor – pikërisht kjo e dallon Bashkimin Evropian dhe gjuhët e folura në komunitet janë një pjesë e rëndësishme e..