Para gazetarëve në Bruksel, para fillimit të takimit të jashtëzakonshëm të Këshillit Evropian, presidenti Rumen Radev theksoi se tema e integrimit evropian të Republikës së Maqedonisë së Veriut nuk është në rendin e ditës, por domosdoshmërish do të ngrihet prej tij. Sipas Radev, problemet me Maqedoninë e Veriut përvijojnë qasjen e përgjithshme të BE-së për të ardhmen tonë si një bashkim i bazuar në vlera dhe parime. Kreu i shtetit kujtoi se në dy vitet e fundit ai mbrojti pozitën e vendit tonë në të gjitha formatet evropiane, duke përfshirë edhe vendosjen e vetos, që të kuptohet serioziteti i këtij problemi në të gjithë thellësinë e tij. “Qëndrimi bullgar për këtë çështje është në fakt qëndrim adekuat evropian dhe pikërisht ky qëndrim ka gjetur vend në kornizën negociuese për Maqedoninë e Veriut”, theksoi Rumen Radev. Kreu i shtetit theksoi se agresioni dhe përshkallëzimi i fushatës antibullgare në Maqedoninë e Veriut tashmë po çon në krime të urrejtjes - zjarrvënie, qitje kundër klubeve kulturore, dhunë fizike ndaj bullgarëve të Maqedonisë dhe qytetarëve bullgarë. Prandaj, kreu i shtetit insiston që Bashkimi Evropian të vendosë monitorim dhe garanci për respektimin e të drejtave të bullgarëve të Maqedonisë në Maqedoninë e Veriut.