Informacioni i paraqitur nga “Die Welt” se Bullgaria në kohën e qeverisë së Kirill Petkovit ka dërguar armë në Ukrainë ka shkaktuar reagime të ndryshme në mesin e partive politike. Partitë GERB dhe "Bullgaria Demokratike", të cilat këmbëngulin që vendi ynë të ndihmojë Kievin, qortuan kabinetin e mëparshëm për fshehjen e informacionit. Sipas Hristo Ivanovit nga partia “Bullgaria Demokratike”, dërgesa e armëve duhet të ishte bërë në mënyrë të hapur dhe pa ndërmjetës. "Nuk ka pasur eksport të drejtpërdrejtë të armëve nga Bullgaria në Ukrainë. Bullgaria eksportoi armë në një numër vendesh, duke përfshirë SHBA, Britaninë e Madhe, Poloninë, Rumaninë, pas së cilës këto armë arritën në Ukrainë," tha njëri nga kryetarët e Partisë "Po e vazhdojmë ndryshimin" Asen Vasilev. Bashkëkryetari tjetër Kirill Petkov shprehu kënaqësinë e tij: "Jemi të kënaqur që titulli e thotë qartë, se Bullgaria ka pasur një rol themelor dhe është në anën e duhur të historisë". "Bullgaria nuk ka eksportuar drejtpërdrejt armë në Ukrainë dhe kushdo që pretendon të kundërtën gënjen," tha kryetarja e Partisë Socialiste të Bullgarisë Kornelia Ninova. Stefan Janev – kryetar i Partisë “Ngritja bullgare” dhe ish-ministër i Mbrojtjes deklaroi se artikulli i gazetës “Di Welt” nuk përbën lajm dhe sqaroi: “Kur bëhet fjalë për biznes, është normale që industria bullgare e armëve të kërkojë tregje, përfshirë edhe rastet kur ka luftë dhe ato tregje, le të themi, janë më fitimprurëse“. 

• Bullgaria e shpëtoi Ukrainën “fshehurazi” në fillim të luftës