Sofja e furnizonte Kievin me karburant dhe armë të epokës sovjetike, por iu desh të mbante sekrete furnizimet për shkak të politikanëve pro-rus në qeveri. Në pranverën e vitit 2022, ushtrisë ukrainase i mungonte karburant dhe municione sovjetike për të luftuar rusët. Shpëtimi erdhi papritur nga Bullgaria, njofton politico.eu dhe VELT nga grupi mediatik Axel Springer, duke cituar intervista me ministrin e jashtëm ukrainas Dmitro Kuleba, ish-kryeministrin bullgar Kirill Petkov dhe ish ministrin e financave Asen Vasilev. Sipas tyre, në ditët e para të luftës, rreth 40 për qind e karburantit për Ukrainën dhe rreth 1/3 e predhave të përdorura vinin nga Bullgaria. Furnizimet e municioneve për rreth 2 miliardë euro u paguan nga SHBA dhe Britania e Madhe.

Pasi dërgoi më shumë se 150 000 predha nga rezervat e tij në Evropë, Pentagoni dërgoi predha nga magazinat e tij ushtarake në Izrael dhe Korenë e Jugut në Ukrainë, raporton New York Times. Të dy vendet ranë dakord për këtë derisa prodhimi ushtarak amerikan të rritet. Ukraina përdor rreth 90 000 predha në muaj, që është dy herë më shumë sesa prodhohen në Evropë dhe SHBA, thekson botimi.

Sekretari amerikan i shtetit, Anthony Blinken, në një takim në Uashington me ministrin e jashtëm britanik, James Cleverley, i cilësoi si të papranueshme pretendimet e Moskës se Kievi të pranojë “realitetet e reja territoriale” dhe të heqë dorë nga territoret e pushtuara nga agresorët rusë. Në një konferencë të përbashkët shtypi, Blinken shtoi se aleatët do të ofrojnë gjithçka që i nevojitet Ukrainës për t’i rezistuar agresionit rus.