Në një deklaratë të përbashkët, presidentët e Bullgarisë, Republikës Çeke, Estonisë, Hungarisë, Letonisë, Lituanisë, Polonisë, Rumanisë dhe Sllovakisë dënuan bombardimet masive ruse të qyteteve në Ukrainë. Krerët e shteteve B9 bënë thirrje për ndërprerjen e menjëhershme të sulmeve kundër objektivave civile në Ukrainë. Sipas të drejtës ndërkombëtare, sulme të tilla trajtohen si krime lufte, thuhet në qëndrimin e përbashkët.

Presidentët e cilësojnë kërcënimin e përdorimit të armëve bërthamore nga Rusia si të papranueshëm dhe konfirmojnë angazhimin e tyre për garantimin e sigurisë kolektive, njoftoi qendra e shtypit e presidentit bullgar Rumen Radev.