Thirrja e Ambasadorit tonë në Moskë për konsultime në vendin tonë është një veprim logjik. Kështu, Presidenti Rumen Radev e komentoi deklaratën e Kryeministrit Kirill Petkov, i cili paralajmëroi se Sofja do të thërrasë ambasadorin e saj nga Moska për konsultime.

Lidhur me deklaratën e Ambasadores ruse Eleonora Mitrofanova për mediat ruse, Radev tha: “Asnjë ambasador nuk ka të drejtë të përvetësojë të drejtën për të folur në emër të popullit bullgar”.

Sipas kryeministrit, thirrja e ambasadorit bullgar në gjuhë diplomatike do të thotë se të njëjtën gjë duhet ta bëjë edhe shteti tjetër.

Reagimi erdhi pasi Ambasada ruse tha se është “e papranueshme që zyrtarët, pavarësisht gradës së tyre, të kritikojnë një ambasador”.

Më herët Kryeministri paralajmëroi se do të ketë një përgjigje diplomatike për shkak të deklaratave në media të Ambasadores ruse në Sofje Eleonora Mitrofanova. Nuk ka asnjë qytetar bullgar i cili të gëzohet kur një diplomat i huaj i ofendon bullgarët dhe qeverinë bullgare, tha Petkov, duke shtuar se qeveria dënon sjelljen e Ambasadores ruse.