NATO po rrit praninë e saj ushtarake në krahun lindor të Aleancës duke vendosur forca shtesë mbrojtëse tokësore, detare dhe ajrore, tha Sekretari i Përgjithshëm i NATO-s, Jens Stoltenberg. Ai shprehu shpresën se Rusia nuk do të sulmojë një anëtar të Paktit. “Një sulm ndaj një anëtari të NATO-s do të nënkuptonte një sulm ndaj të gjithëve”, tha ai. Me kërkesë të Bullgarisë dhe vendeve të tjera anëtare nga Evropa Lindore, Këshilli i Atlantikut të Veriut ra dakord të fillojnë bisedime sipas nenit 4, që parashikon konsultime urgjente në rast një kërcënimi për integritetin territorial ose sigurinë e një vendi të Aleancës. Gjithashtu u bë e qartë se trupa të Paktit nuk do të dërgohen në Ukrainë.