Ministri i Punës dhe Politikës Sociale Biser Petkov u takua me Ambasadoren e Republikës së Shqipërisë në Bullgari Donika Hoxha me iniciativë të saj. Gjatë bisedimit u shqyrtua përgatitja e një Marrëveshjeje të re për sigurim social mes dy vendeve tona, marrëveshje kjo e cila do të zëvendësojë atë nga viti 1954. Ministri Petkov dhe Ambasadorja Hoxha kanë shprehur dëshirë që dokumenti të aktualizohet në kontekstin e marrëdhënieve dinamike ekonomike dhe numrit në rritje të shtetasve bullgarë dhe të atyre shqiptarë, të cilët punojnë në të dyja vendet. Ata kanë deklaruar gjithashtu se dëshirojnë që përgatitja e marrëveshjes në mes të dy vendeve të fillojë sa më shpejt. Nënshkrimi i Marrëveshjes do të inkurajojë punësimin dhe lëvizjen e krahut të punës dhe do të ndihmojë mbrojtjen më të mirë të të drejtave të sigurimit të qytetarëve, të cilët punojnë në Bullgari dhe Shqipëri, tha Ministri Petkov. Nga ana e vet Shkëlqesia e Saj Donika Hoxha e falënderoi Bullgarinë për përkrahjen ndaj Shqipërisë në rrugën e saj drejt BE-së dhe shprehu shpresë se dy vendet tona do të vazhdojnë të këmbejnë përvojë në fushën e punës dhe politikës sociale.