Që prej kohe në Bullgari flitet për aplikimin e euros, por ende nuk është bërë ndonjë gjë konkrete për hyrjen tonë në eurozonë. Shpejto ngadalë – siç duket, e tillë do të jetë politika e autoriteteve bullgare në këtë drejtim, sepse vendi ynë de facto është në eurozonë. Dhe kjo është kështu, sepse në Bullgari funksionon Bordi Monetar, sipas të cilit valuta bullgare levi është fiksuar ndaj euros. Me rritjen e vlerës së euros, rritet edhe ajo e levit bullgar dhe e kundërta. Euroja ,madje përdoret në disa pagime të brendshme – për blerjen e pasurive të patundshme për shembull. Sigurisht që nuk bëhet fjalë për anëtarësi me të drejta të plota në eurozonë, me të gjitha detyrimet dhe të drejtat e kësaj anëtarësie, por edhe kjo është diçka. Ekonomia e ripohon këtë me tempet e saj të mira dhe me rritjen prej 4 për qind të Produktit të Brendshëm Bruto.

Mirëpo, kjo është një gjendje e përkohshme dhe qëllimi përfundimtar është anëtarësia e vërtetë në eurozonë. Në këtë drejtim gjatë disa ditëve të fundit kishte mjaftë lajme të mira për autoritetet në Sofje. Së pari Zëvendëskryetari i Komisionit Evropian, i cili përgjigjet për euron dhe dialogun social, Valdis Dombrovskis, duke folur për pakon e shumëpritur prej masash për reforma në eurozonë, përmendi se Bullgaria tashmë është gati për të hyrë në mekanizimin valutor evropian ERM2, mekanizëm ky i cili është i njohur si “salla e pritjes e eurozonës”. Përvoja e deritanishme tregon se pritja vazhdon 2-3 vjet. Dombrovski jo vetëm se e ftoi në këtë mënyrë Bullgarinë në “sallën e pritjes”, por edhe premtoi ndihmë nga Komisioni Evropian – teknike, konsultative, financiare. Bullgarja me pozita më të larta në botë – Kryedrejtoresha e Bankës Botërore Kristalina Georgieva, deklaroi shumë qartë se Bullgaria do të hyjë në “sallën e pritjes” që vitin tjetër. Më shumë qartësi rreth kësaj çështjeje na solli eurokomisioneri për buxhetin Günter Oettinger, sipas të cilit Bullgaria dhe Kroacia janë shtetet e tjera, të cilat do të bashkohen me eurozonën. Para pak kohe edhe vetë shefi i Komisionit Evropian Jean-Claude Juncker kishte përmendur se dyert e eurozonës janë të hapura për Bullgarinë.

E gjithë kjo tingëllon mirë dhe i inkurajon autoritetet bullgare. Mirëpo, çfarë mendojnë bullgarët e zakonshëm sa i përket kësaj çështjeje dhe çfarë janë vlerësimet e ekspertëve ekonomikë për pasojat e aplikimit të euros? Qytetarët bullgarë janë të ndarë në dy grupe pothuaj të njëjta sa i përket euros. Njëri grup e përkrah absolutisht aderimin tonë në eurozonë, kurse tjetri është më i matur dhe nuk e përqafon kaq nxehtë këtë ide, duke pasur frikë nga rritja e çmimeve dhe sepse sipas tij nuk ka dobi të mëdha nga aplikimi i valutës së përbashkët. Rritja e çmimeve ripohohet nga përvoja e shteteve të tjera anëtare të eurozonës. Mirëpo, dallimi sa i përket Bullgarisë është mjaftë i ndjeshëm, sepse 1/3 prej bullgarëve jetojnë me të ardhura nën nivelin e varfërisë prej afro 150 eurosh në muaj. Për këta bullgarë madje rritja minimale e mallrave dhe shërbimeve është një temë shumë e dhimbshme. Përveç kësaj ekspertët në lëmin e ekonomisë theksojnë se kjo varfëri dhe niveli i ulët i jetesës në përgjithësi janë pengesat kryesore para vendimit për hyrjen në eurozonë dhe se në këtë sfond një “po” eventuale do të ketë më tepër motivacion politik. Le të rikujtojmë se edhe gjatë aderimit të Bullgarisë në BE mbizotëronin argumentet politike kundrejt realiteteve ekonomike. Atëherë – gjatë vitit 2007, edhe tani, indikatorët ekonomikë në Evropë ishin dhe janë pozitivë dhe kjo është një premisë e konsiderueshme për hyrjen e Bullgarisë në Eurozonë. Le të rikujtojmë në këtë kontekst fjalët e Kryeministrit Bojko Borisov, i cili tha para pak kohe me këtë rast se Bullgaria nuk do të krijojë probleme të reja në eurozonë, sepse të gjithë treguesit e saj makroekonomikë janë të shkëlqyeshëm.

Përgatiti në shqip: Vesella Mançeva