Standardi i jetesës në Bullgari është më i ulët në tërë Evropën. Kjo dihet prej kohës edhe nga qeveritarët, edhe nga qytetarët, edhe nga sindikatat, edhe nga partitë politike. Varësisht nga ideologjitë e mbrojtura dhe pikëpamjet ekonomike, qeveritarët e ndryshëm gjatë 30 vjetëve të fundit përpiqeshin të merrnin masa për rritjen e të ardhurave të bullgarëve dhe për përmirësimin e nivelit të cilësisë së jetesës së tyre. Disa përkrahnin tezën neoliberale, se secili merr aq, sa ka prodhuar. Kurse të tjerët – kryesisht përfaqësuesit e së majtës, theksonin mbi domosdoshmërinë për t’i ndihmuar njerëzit me më shumë para publike dhe ndihma sociale.

Gjatë viteve të fundit në krye të shtetit ishin dy qeveri të kryeministrit Bojko Borisov, i cili është shefi i partisë së qendrës së djathtë GERB. Politika ekonomike dhe financiare e këtyre qeverive tregonte se ai është përkrahës i formave më të pastra të marrëdhënieve tregtare në tregun e punës, d.m.th. për më pak ndërhyrje të shtetit në sferën sociale. Theksi ishte vënë mbi projektet e mëdha me vlerë të lartë për autostrada, rruga, gazsjellës dhe lidhje tubacionesh dhe projekte të tjera infrastrukturore. Për to ishte përdorur resursi kryesor financiar i shtetit. Të varfëritë, të sëmurët dhe të moshuarit nuk qenë në qendrën e vëmendje së dy qeverive në fjalë.

Dhe ndoshta për këtë arsye në zgjedhjet presidenciale në fund të vitit të kaluar fitoi kandidati i përkrahur nga Partia Socialiste Rumen Radev. Ky fakt përforcoi ambiciet e socialistëve për zgjedhjet e ardhshme parlamentare. Nga ana tjetër u bë e qartë, se pavarësisht nga rëndësia e padiskutueshme e projekteve infrastrukturore, “bullgarët nuk hanë asfalt” – siç komentojnë kritikët e politikës së Bojko Borisovit.

Fushata paraelektorale për zgjedhjet e parakohshme parlamentare akoma nuk ka filluar. Pavarësisht nga kjo dy partitë kryesore – GERB dhe Partia Socialiste Bullgare tashmë prezantuan programet e tyre ekonomike dhe sociale, me të cilat do të konkurrohen para zgjedhjeve. Ato nuk dallohen në mënyrë të konsiderueshme. Po t’i lexoni do të mendoni, se problemet e të varfërve në Bullgari janë para fundit të tyre, se së shpejti pensionet, pagat në sektorin publik, kompensimet dhe ndihmat sociale do të bëhen më të larta.

Kundërshtimi kryesor që mbetet mbas unanimit të dukshëm të oponentëve politikë është në këtë a duhet të harxhohen për njerëzit rezervat dhe tepricat e grumbulluara buxhetore, apo për asfalt, po të flasim në mënyrë figurative. Sindikatët janë kategorikë, se dëshirojnë para për familjet, punëdhënësit janë kundër ndërtimit të projekteve gjigante infrastrukturore me para publike.

Se çfarë do të bëhet në zgjedhjet e ardhshme është vështirë që të prognozohet, sepse sipas analizave sociologjike diferencat në përqindje midis dy oponentëve kryesorë janë tepër të vogla. Vetëm mund të thuhet se në Bullgari po vëzhgohet një valë e majtë, me orientim social dhe me një ndjeshmëri më të madhe për shqetësimet e qytetarëve të zakonshëm. Për fat të keq kjo situatë provokon kujtime jo të mira – herën e fundit, kur partia e majtë erdhi në pushtet, jo vetëm se nuk bëri diçka të mirë për mirëqenien e bullgarëve, por bile përforcoi dallimet sociale – të varfëritë u bënë më të varfër, të pasurit u pasuruan akoma më shumë.

Përgatiti në shqip: Jordanka Ivanova