Vendimi i papritur i reformatorëve të pranojnë mandatin e dorëzuar nga presidenti për formimin e kabinetit provokoi habinë e të gjithëve. Arsyetimet për këtë janë serioze dhe çojnë te mendimi deri ku mund të arrijnë kthesat në jetën politike bullgare. E pështjelluar nga zhvillimet, shoqëria pret me padurim për të zbuluar “shumicën parlamentare për formimin e një qeverie të re në kuadrin e Legjislaturës së tanishme të Kuvendit Popullor”, shpallur dje nga partia GERB pas konsultimeve me Bllokun e Reformatorëve dhe Frontin Patriotik.

Gjatë muajit të fundit dy forcat e mëdha – partia GERB dhe Partia Socialiste Bullgare i refuzuan presidentit të formojnë qeveri me argumentin, se në kuadrin e parlamentit të tanishëm një e tillë nuk mund të ketë. Kur nga Fronti Patriotik shprehën gatishmëri të formojnë qeveri, Blloku i Reformatorëve mendonte, se ky ishte një hap i arsyeshëm, duke marrë parasysh formimin e një qeverie programore ose të ekspertëve. Pasi presidenti vendosi që t’i mos japë atyre mandat, patriotët u ofenduan dhe shprehën mendimin, se kjo u bë nën presionin nga jashtë. Tani duken të prirë të përkrahin formimin e një qeverie. Mospërputhje kishte edhe përsa iu përket detyrave, të cilat një qeveri e tillë duhet të ketë. Mirëpo, pasi programi i kabinetit akoma i paformuar mezi tani do të kontraktohet, për kapërcimin e tyre është herët të flitet. Është herët të flitet edhe për përbërjen e qeverisë eventuale, sepse sipas mbajtësit të mandatit për formimin e saj kryeministri dhe ministrat do të caktohen në varësi të programit. Tani për tani dihet vetëm, se kryeministri i qeverisë eventuale do të jetë nga Blloku i Reformatorëve, ndërsa nga GERB janë të prirë të përfshihen në të me ministra të vet.

Shumica e re parlamentare mund të mos jetë aq e qartë, por në hapësirën e majtë politike pozita kundër saj është kategorike. Liderja e socialistëve Kornelija Ninova deklaroi kategorikisht, se nuk ka variant, që ata të përkrahin qeverinë e re të Bllokut të Reformatorëve dhe partisë GERB, sepse kjo do të jetë një katastrofë për Bullgarinë. Sipas socialistëve, në qeverisjen e deritanishme ishin po ato parti politike. Kështu bullgarëve u propozohen po ata pushtetarë me role të ndërruara.

Është e qartë gjithashtu, se vendimi i Bllokut të Reformatorëve të pranojë mandatin për formimin e qeverisë e çan këtë koalicion parlamentar. Për këtë arsye Demokratë për Bullgarinë e Fortë përjashtuan nga radhët ministrin e deritanishëm të shëndetësisë Petër Moskov. Krahas kësaj ata deklaruan qartë përkrahjen e tyre për projektin e ri politik të Hristo Ivanovit, i cili e vë për detyrë luftimin e korrupsionit. Ai ka ndërmend, që në zgjedhjet e ardhshme të bashkojë rreth kësaj kauze edhe forca të tjera politike.

Kështu në mënyrë paradoksale vendimi për formimin e qeverisë në kuadrin e Legjislaturës së Parlamentit të tanishëm as nuk heq, as nuk zvogëlon të panjohurat për të ardhmen e afërt politike në Bullgari, por gjeneron më shumë pikëpyetje. Rezultati është çështja e një kohe të shkurtër, ndoshta edhe e orëve të numëruara, por sipas disa mund të vonojë.

Përgatiti në shqip: Svetllana Dimitrova