Para dy vjetësh u mbyll, pas kësaj u shpall në falimentin Banka Korporative Tregtare (KTB), e katërta për nga madhësia në Bullgari e biznesmenit dhe bankierit Cvetan Vasilev. Që atëherë Banka qendrore dhe Prokuroria e akuzuan shefin dhe aksionarin e saj kryesor në grabitjen e bankës, në publikimin e të dhënave, se u ka dhënë firmave të tij personale, të afërmeve dhe miqve të tij kredi pa garancitë e nevojshme me ndërgjegjen e plotë se këto para kurrë nuk do të shlyhen. U konstatua se në bankë mungojnë mbi 2 miliardë euro. Në bazë të ligjit për garantimin e depozitave u ishte paguar mbi 1.5 mlrd euro më se 100 mijë depozituesve. Për këtë ndihmoi shteti, duke marrë një kredi të re të jashtme, sepse në Fondin për garantimin e kursimeve nuk kishte mjaft para.

Bankieri-pronar Cvetan Vasilev ishte një njeri shumë i pasur dhe me influencë, fjala e tij dëgjohej në rrethet e larta qeveritare, në centralet e partive kryesore politike. Për shkak të rrjetit të gjerë të lidhjeve dhe të ndikimeve të dukshme e të padukshme dhe nën presionin e dhjetëra mijë depozitueseve të prekur, me detyrën që të zbulohet e vërteta dhe eventualisht të ndihmohet për mbledhjen e kredive – borxh u ngarkua një firmë e huaj e specializuar. Supozohej, se kompania e njohur me reputacion ndërkombëtar në mënyrë kompetente dhe paanësi do të hetojë rastin dhe nuk do të ndikohet nga lobitë e ndryshme politike dhe të biznesit në vend. U zgjodh një firmë angleze me kompetenca të vërtetuara dhe me përvojë në hetimin e kazuseve të ndërlikuara financiare. Këto ditë u publikua raporti i saj për problemet në Bankën Korporative Tregtare.

U bë e qartë, se prognozat më të këqija dhe dyshimet më të errëta, janë plotësisht të arsyeshme. Me argument dhe fakte Alix Partners arritën në konkluzionin, se fajtori kryesor për falimentin e bankës është aksionari i saj kryesor Cvetan Vasilev. U bë e qartë, se prej shumës 2 mlrd euro që mungonte në bankë, 1.3 mlrd euro janë marrë personalisht nga bankieri dhe firmat e tij. Në fakt ky bankier, i cili ishte shpallur para disa vitesh si Bankieri numër një në Bullgari, e ka përdorur bankën si portofol të vet, sepse në praktikë askush nuk e ka kontrolluar. Në teori – Banka qendrore e ka këtë detyrë – të kontrollit. Por duke parë si retë po errësohen mbi Bankën Korporative Tregtare, Banka Popullore Bullgare i siguronte të gjitha mediat, se sistemi bankar në vend është i qëndrueshëm dhe nuk ka asfare probleme të cilat të rrezikojnë kursimet e qytetarëve dhe firmave. Pas kësaj ajo sikur u tremb dhe filloi të trillojë historira të ndryshme të ngjashme me ato të romaneve kriminale. U bë e qartë, se udhëheqja e Bankës qendrore nuk ishte në dijeni për të vërtetën. Jo rastësisht shefi i mbikëqyrjes bankare ra në duart e Prokurorisë, ndërsa guvernatori i Bankës qendrore u largua me shumë zhurmë dhe me emër të njollosur. Vetë pronari i Bankës Korporative iku jashtë shtetit, nga autoritetet bullgare prej afro dy vjetësh përpiqen të ekstradojnë pa sukses. Ekspertët e pavarur anglezë nuk janë optimist dhe mendojnë, se mezi rreth 400 mln euro prej të gjitha borxheve mund të kthehen ndonjë ditë.

Banka Popullore Bullgaren tashmë ka udhëheqje të re, ndërsa Banka Korporative Tregtare nuk ekziston më. Tronditje financiare në vend nuk ka dhe gjithçka në sistemin bankar duket e qartë dhe në rregull. Por a është në të vërtetë kështu do të tregojnë rezultatet nga stres testet, të cilat Banka qendrore do t’u bëjë të gjitha institucioneve kreditore në vend për të parë cilësinë e kredive të dhënë prej tyre.

Përgatiti në shqip: Sofia Popova