Fluksi i migracionit përmes Detit Mesdhe drejt Evropës dhe rritja e incidenteve tragjike në lidhje me këtë migracion, u bënë shkas që BE-ja të marrë vendime të jashtëzakonshme. Fundosja e një anije, që mori jetën e qindra imigrantëve ilegalë këtë weekend, u bë shkas për zhvillimin e një mbledhjeje të jashtëzakonshme prej 24 orësh të Këshillit “Punët e Jashtme” në Luksemburg, me pjesëmarrjen e 41 ministrave të punëve të jashtme dhe të atyre të punëve të brendshme. Komisioni Evropian prezantoi në forum një plan për përballimin e presionit të migracionit nga deti, i cili u përkrah nga delegacioni bullgar, me kushtin se nuk duhet harruar edhe fluksi i imigrantëve nga toka.

Në Luksemburg Ministrja e Punëve të Brendshme Rumjana Bëçvarova nguli këmbë se njëkohësisht me problemet në kufijtë tanë detarë, BE-ja duhet t’i vazhdojë përpjekjet kundër presionit të madh të imigrantëve në kufijtë tokësorë, përfshi këtu dhe kufijtë e Bullgarisë, të cilët janë kufi i jashtëm i BE-së. Nga ana e vet, Ministri i Punëve të Jashtme Daniell Mitov nguli këmbë për aplikimin sa më të shpejtë të Marrëveshjes për ripranim me Turqinë, për miratimin e një protokolli për vëzhgim të përbashkët të kufijve midis Bullgarisë dhe Turqisë dhe midis Bullgarisë, Turqisë dhe Greqisë, si dhe për livrimin e më shume mjeteve evropiane për përballimin e fluksit të refugjatëve. Pas mbledhjes së Këshillit “Punët e Jashtme” Kryeministri Bojko Borisov e ashpërsoi tonin dhe në stilin e tij tipik deklaroi haptazi se nuk është i kënaqur për bashkëpunimin midis vendeve fqinje në përballimin e problemeve të sigurimit në kufij. Bojko Borisov është i mendimit se BE-ja nuk duhet të përqendrohet vetëm te kufijtë detarë, sepse “në qoftë se ata forcohen me më shumë mjete, tërë presioni i migracionit do të vijë nga kufijtë tokësorë”. Pra, nënkuptohet se pala bullgare është për një zgjidhje të balancuar të problemit.

Pozitat e Sofjes, që u deklaruan në Luksemburg, nuk janë risi, ose befasim, por më tepër rikujtim se pretendimet bullgare për më shumë përkrahje dhe solidaritet në përballimin e presionit të migracionit nuk janë respektuar. Para rreth një muaji në mbledhjen e rregullt të Këshillit “Punët e Jashtme” në Bruksel, Ministri i Punëve të Jashtme Daniell Mitov përsëri e vuri theksin te domosdoshmëria për ndihmë financiare për Bullgarinë, jo vetëm për shkak të presionit të forcuar të migracionit nga toka, por edhe për shkak të refugjatëve, të cilët tashmë u pritën nga vendi. Midis mbledhjes së rregullt dhe asaj të jashtëzakonshme të Këshillit “Punët e Jashtme” u shpallën të dhëna zyrtare, sipas të cilave për vendin më të varfër në BE, Bullgarinë, përkrahja e parashikuar financiare evropiane për refugjatët është shumë e vogël. Estonia, për shembull, e cila është më pak e prekur nga problemi, merr 53 herë më shumë mjete sesa Bullgaria. Kërkesat e Bullgarisë për më shumë solidaritet dhe përkrahje nuk janë përjashtim, por shtrohen nga të gjitha shtetet më të prekura në kufirin e jashtëm jugor dhe në atë juglindor të BE-së.

Shqetësimet për presionin e migracionit nga deti janë të arsyeshme. Gjatë vitit 2014 kanë provuar ta kalojnë përmes Detit Mesdhe afro 220 mijë refugjatë dhe imigrantë ilegalë dhe kanë vdekur të paktën 3500 veta. Sipas të dhënave të agjencisë kufitare të BE-së FRONTEKS numri i tyre për dy muajt e parë të vitit 2015 tashmë është me një të tretën më i madh në krahasim me periudhën e njëjtë të vitit të kaluar. Mirëpo, të arsyeshme janë edhe shqetësimet e Sofjes. Agjencia Bullgare për Refugjatët konstaton se në krahasim me periudhën e njëjtë të vitit të kaluar numri i imigrantëve ilegalë, të cilët ushtrojnë presion ndaj territorit kombëtar nga toka, për tremujorin e parë të 2015-ës është rritur me 60 për qind, pa përfshirë këtu presionin në pranverë. Evropa ndodhet para një problemi pa precedent lidhur me presionin e migracionit në kufijtë e saj dhe siç duket ky problem mund të zgjidhet vetëm me përpjekje dhe mjete të balancuara. Pikërisht për kërkimin e një metode të tillë u thirr Këshilli i Jashtëzakonshëm Evropian për Migracionin.

Përgatiti në shqip: Vesella Mançeva