Pas disa ditësh Lili Bogdanova do të paraqesë albumin e saj të parë solo. Ai e ka titullin “Vajza me flokët e verdha” – siç është titulli i një prej pjesëve, të përfshira në koleksion. Titulli ka dhe nuanca personale, sepse flokët e vajzës së re janë me ngjyrë të tillë. Ajo është një vajzë e bukur, e cila pikturon si të thuash muzikën e Debussy. Incizimet janë bërë në Vjenë, kurse koncerti-promovim do të mbahet më 24 nëntor në sallën “Bullgaria”.

Përveç albumit të ri, Lili ka akoma një shkas për krenari profesionale. Gjatë javës së parë të nëntorit ajo mori pjesë në Konkursin Ndërkombëtar për Pianistë nën egjidën e princeshës së Marokut Lalla Meryem.

“Kam marrë pjesë në shumë konkurse për piano, por ky është konkursi më i madh në biografinë time deri tani. Kishte mbi 100 përfaqësues nga Rusia, Franca, Italia, Japonia... Gjithsej nga 20 shtete. Çmimi, që fitova atje, është një dekoratë speciale, e cila jepet për interpretimin më të mirë të një sonate të Mocartit. Vepra ishte ndër pjesët e detyrueshme të konkursit. Jam e lumtur, sepse jam e bindur se veprat e këtij kompozitori janë shumë të vështira dhe jo vetëm veprat e tij për piano. Miqtë e mi, të cilët luajnë në vegla të tjera muzikore, gjithashtu janë të këtij mendimi. Nuk duhet të nënvlerësohet fakti se ndër kaq shumë pjesëmarrës, të cilët interpretuan një vepër, pikërisht unë arrita t’i bëj përshtypje jurisë. Vërtetë, jam shumë e lumtur.”

Përgatiti në shqip: Vesella Mançeva