Bullgarët me dëshire dhe shumë shpejtë pranojnë inovacionet, me gjithë se në parim janë njerëz realistë, madje dhe pak pesimistë. Por kur bëhet fjalë për pajisje dhe shërbime të reja që në të vërtetë janë të dobishme, ata nuk hezitojnë shumë. Kështu që për rreth 20 vjet numri i kartave elektronike bankare në vend arriti numrin e popullsisë. Natyrisht, fëmijët e vegjël dhe të miturit nuk kanë mundësi të disponojnë këtë mjet modern të pagesave, kështu që në praktikë shumë bullgarë disponojnë nga disa karta debiti dhe krediti. Studimi i zhvilluar para pak kohe nga një prej kompanive më të mëdha në botë për karta bankare tregoi, se afro gjysma e bullgarëve preferojnë të paguajnë me karta debiti nëse në dyqanin përkatës ka POS terminal, kur bëhet fjala për blerje në vlerë mbi 15 euro. Mënyra tjetër e preferuar për përdorimin e kartave plastike është tërheqja e parave në dorë nga bankomati. Numri i tyre në Sofje është rreth 1000 dhe janë të rreth 30 bankave që operojnë në vend. Nga ana tjetër, sa më shumë shkurtohet sektori informal në ekonomi, aq më i madh është niveli i pagave të punonjësve që jepen në rrugë bankare, që gjithashtu është një premisë për përdorimin e kartave si për pazar, ashtu edhe për tërheqjen e parave kesh. Të mos harrojmë gjithashtu dhe numrin e madh të pensionistëve bullgarë, një pjesë e madhe prej të cilëve marrin pensionin e tyre mujor në rrugë elektronike. Këtu duhet të shtojmë dhe bumi i tregtisë elektronike, e cila në fakt është e pamundur në qoftë se nuk ke kartë bankare.

Si rezultat i kësaj çdo bullgari i takon nga një kartë bankare, d.m.th. numri i tyre në vend tejkalon shifrën 7 mln. Natyrisht dominojnë kartat e debitit, ndërsa ato kreditore janë 7 herë më pak. Në treg dominimi i dy gjigantëve botëror bankar Visa dhe Maestro është total dhe dy kartat e tyre më të njohura përbëjnë afro 80 % prej të gjitha kartave në përdorim.

Për atë sa bullgarët u kanë besim kartave dhe si i përdorin flasin shifrat. Sipas Bankës Popullore Bullgare volumi i transaksioneve gjatë vitit të kaluar ka tejkaluar 10 mlrd euro, pritjet për këtë vit janë për  një rritje me afro 1 mlrd euro.

Shpesh herë, kur bëhet fjalë për përdorimin e kartave bankare përmendet edhe rreziku për keqpërdorime, falsifikime dhe vjedhje të identitetit. Kjo i shtyn shumë njerëz të jenë shumë të përmbajtur dhe të sillen negativisht ndaj pagesave elektronike në internet, për shembull. Edhe në Bullgari mungojnë garancitë kategorike, se nuk do të zbulojnë PIN kodin tuaj dhe do të tërheqin në mënyrë të paligjshme mjetet financiare nga llogaria juaj bankare. Por tani për tani problemi është më tepër psikologjik, se sa  real, sepse sipas ekspertëve, krimet me kartat bankare gjatë vitit të kaluar kanë qenë në Bullgari në vlerë modeste prej 4 mln eurosh.

Përgatiti në shqip: Sofia Popova