Zgjedhje 2011 – më shumë pika votimi për bullgarët jashtë shtetit

botuar më 11-10-13 10.12.PD

Më 23 tetor në Bullgari do të zhvillohen zgjedhje për president dhe për autoritete vendore, por sipas Kodit zgjedhor në to bullgarët jashtë shtetit mund të votojnë vetëm për president.

Foto: BGNES

Më 23 tetor të vitit 2011 në Bullgari do të zhvillohen zgjedhje “dy në një” – për president dhe për autoritete vendore. Sipas Kodit zgjedhor në to bullgarët jashtë shtetit mund të votojnë vetëm për president. Megjithëse tek ne kreu i shtetit është me autorizime të kufizuara, zgjedhja e tij është e rëndësishme. Ky është i vetmi post i lartë që zgjidhet drejtpërdrejt nga populli, në dallim të kryeministrit dhe shefit të Kuvendit Popullor, dhe me një mandat me një vit më të gjatë se ata – 5 vjet. Prandaj aktiviteti i bullgarëve jashtë shtetit nuk është pa rëndësi. Në kuadër të BE-së më shumë janë bullgarët në Angli, Greqi, Spanjë dhe Gjermani. Por jo pak qytetarë bullgarë ka dhe në SHBA, Kanada, Turqi, Moldavi, Maqedoni etj. Nuk ka një statistikë zyrtare për numrin e bullgarëve që banojnë në shtete të huaja.

Sekretari i përhershëm i Ministrisë së Punëve të Jashtme Radi Najdenov

“Nuk kemi një numër të saktë të bullgarëve që banojnë jashtë shtetit, saktësoi sekretari i përhershëm i Ministrisë së Punëve të Jashtme, Radi Najdenov. – Legjislacioni bullgar nga viti 1990 nuk parashikon një regjistrim të detyrueshëm në ambasada dhe konsullata, siç ishte më parë. Në disa vende ministritë e brendshme kanë një statistikë publike për numrin e qytetarëve të shteteve të tjera ose të qytetarëve të tyre me origjinë të huaj. Për shembull në Austri çdo vit këto të dhëna prezantohen nga Ministria Federale e Punëve të Brendshme. Por praktika nëpër botë është e ndryshme dhe ka diferenca midis të dhënave zyrtare dhe informatave të bashkësive bullgare. Për shembull sipas Bashkësisë Kishtare Bullgare në Vjenë banojnë rreth 30 mijë bullgarë, ndërsa sipas statistikës zyrtare ata janë 11-13 mijë.”

Aktiviteti i bashkatdhetarëve tanë jashtë shtetit në zgjedhje parimisht është i ulët, më tepër sepse ende nuk ka votim nëpërmjet internetit. Megjithatë pritet që në këto zgjedhje më shumë bullgarë nga jashtë të ushtrojnë të drejtën e tyre të votimit. Sipas të dhënave të MPJ-së për zgjedhjet e sivjetshme presidenciale pikat e votimit jashtë shtetit do të jenë më shumë për të 10 vjetët e fundit – 161. Gjatë vitit 2001 ato ishin 156, kurse gjatë vitit 2006 – 144. Numri i pikave të votimit është më i madh në fqinjën tonë jugore – Turqinë. Në Spanjë tani ato janë 23, ndërsa gjatë vitit 2006 ishin mezi 5. Në SHBA nga 11 gjatë vitit 2006 u bënë 14, shpjegoi Svetlan Stoevi nga MPJ.

“Pikat e votimit në Turqi tani janë 41, në krahasim me 43 pikat në zgjedhjet e mëparshme gjatë vitit 2006. Bën përshtypje se janë më shumë vendbanimet, ku mund të votohet. Ka pakësim të pikave të votimit në disa nga qytetet e mëdha. Në Stamboll tani kemi 3 pika votimi, ndërsa gjatë vitit 2006 ato ishin 9”, shtoi zoti Stoev.

Megjithëse ka më shumë pika votimi, shumë bullgarë me banim jashtë shtetit do të vështirësohen të votojnë. Në disa vende numri i deklaratave për votim është i pamjaftueshëm – nën 100, dhe sipas ligjit nuk mund të hapet një pikë votimi. Kështu që për të votuar, qytetarët duhet të udhëtojnë në distanca të mëdha. Shkaku është se bullgarët i dërguan deklaratat në një zarf të përbashkët ose me një e-mail të përbashkët, që është në kundërshtim me ligjin, siç është rasti i qytetit Surgut në Rusi. Bashkatdhetarë tanë të tjerë nga qytete, ku ka vetëm konsullata nderi, mendonin se në to mund të votohet si në ambasada. Kështu qytete me shumë banues bullgarë si Hamburgu, Darmshtati dhe Magdeburgu në Gjermani, Barcelona në Spanjë, mbetën pa pika votimi. Në Britani të Madhe bullgarët do të mund të votojnë vetëm në Londër dhe Glazgou, në Austri – vetëm në Vjenë, në Itali – vetëm në Romë dhe Napoli. MPJ kërkoi që në tri qytetet me konsullata nderi në Gjermani të organizohen pika votimi, por vendimi do të merret nga Komisioni Qendror i Zgjedhjeve.

“Për ne ishte shumë i rëndësishëm komunikimi me qytetarët bullgarë dhe me përfaqësuesit e bashkësive bullgare jashtë shtetit – tha Radi Najdenovi. – Nuk është sekret se kishte reagime të ndryshme për përgatitjen e procesit të zgjedhjeve, kishte dhe shumë kritika. Por kjo është normale. Më e rëndësishmja është që çdo qytetar bullgar të ketë mundësi të shprehë qëndrimin dhe kërkesat e veta për mënyrën e përgatitjes dhe zhvillimit të zgjedhjeve. Por duke marrë parasysh faktin se kemi një ligj të ri të zgjedhjeve, për ne gjithashtu ishte e rëndësishme të shohim si do ta organizojmë zhvillimin e zgjedhjeve jashtë shtetit.”

Përgatiti në shqip: Ekaterina Tarpomanova

По публикацията работи: Tatjana Obretenova

Последвайте ни и в Google News Showcase, за да научите най-важното от деня!

Ndaje

Zgjedhje 2011 – më shumë pika votimi për bullgarët jashtë shtetit

Më shumë nga rubrika

Cila është partia MEÇ?

Bojko Borisov: Të gjithë janë partnerë potencialë të GERB-it, pa “Vëzrazhdane”

Reagimet e forcave politike pas rezultateve të para zgjedhore (rinovuar)

Ngjarjet me adresë ballkanike