Perspektivat për sistemin bankar bullgar

botuar më 11-06-10 11.50.PD

Perspektiva e sistemit bankar bullgar mbetet negative. Kjo thuhet në raportin e fundit të agjencisë ndërkombëtare të normimit Moody’s për gjendjen e sektorit në Bullgari.

Më shumë hollësi mësojmë nga një publikim në gazetën “Dnevnik”. Shkaku kryesor për vlerësimin e agjencisë Moody’s është rimëkëmbja e ngadaltë e gjendjes ekonomike të vendit dhe mjedisi i pasigurt për biznes. Shkaqet e tjera janë pritjet për rritje të huave të pashlyera dhe varësia e madhe nga mbështetja financiare e bankave të huaja nëna.

“Mjedisi për punë është një sfidë. Ai karakterizohet me një rritje të ulët kreditore, papunësi të lartë dhe rimëkëmbje të dobët ekonomike”, shpjegon Elena Panajotu, analizatore e Moody’s dhe autore e raportit. “Përveç kësaj sektori i pronave të patundshme mbetet nën presion, sepse investitorët perëndimorë tërhiqen. Sipas nesh kërkimi nga ana e këtyre investitorëve ishte një motor kyç i bumit në sektorin e pronave të patundshme para krizës në Bullgari”, shton Panajotu.

Në këto rrethana Moody’s pret që huat e pashlyera të rriten edhe më shumë , sepse në parim ka një vonim midis fillimit të rimëkëmbjes ekonomike dhe kulmit të kredive të pashlyera në sektorin bankar.

Perspektiva që jepet nga Moody’s shpreh pritjet e agjencisë për kushtet e kreditimit në Bullgari gjatë të 12-18 muajve të ardhshëm. Prognozat janë për rritje të huave të pashlyera. Në fund të vitit të kaluar vonimi i pagesave të të ashtuquajturave kredi të këqija ka qenë mbi 90 ditë.

Në një periudhë afatgjatë Moody’s beson se do të krijohen kushte më të favorshme për bankat për shkak të rimëkëmbjes ekonomike dhe perspektivat e ardhshme si rezultat i aderimit të Bullgarisë në ERM II (mekanizmi valutor i njohur si paradhoma e Eurozonës) që pritet të bëhet gjatë të 12-18 muajve të vijueshëm. Megjithatë fitimet e bankave do të pakësohen. Por sistemi ka rezerva dhe mundësi suplementare, të cilat do t’i lejojnë të kapërcejnë humbje të paparashikuara nga kreditë në një skenar të keq. Këta janë faktorë pozitivë.

Raporti vë në dukje se dobësia kryesore e sistemit është varësia e bankave me pronarë të huaj nga financimi i bankave nëna. Në fund të vitit të kaluar financimi i jashtëm ka qenë 22% të financimit të përgjithshëm në sistem. Kjo përqindje i bën bankat të prekshme, sepse mundësitë për mbështetje financiare nga bankat nëna po pakësohen. Kjo është në lidhje dhe me politikën e BE-së për kushte të shtrënguara për marrjen e mjeteve të domosdoshme. Kështu Moody’s pret se bankat bullgare do ta financojnë rritjen e kreditimeve me depozita nga tregu vendës.

Përgatiti në shqip: Ekaterina Tarpomanova

По публикацията работи: Lina Ivanova

Последвайте ни и в Google News Showcase, за да научите най-важното от деня!

Ndaje

Perspektivat për sistemin bankar bullgar

Më shumë nga rubrika

BNB njoftoi ulje të re të normës kryesore të interesit

Georgi Kadiev nga e “Majta”: “Më mirë pres që të hyjmë në Eurozonë në vitin 2027”

Bullgaria ende nuk i plotëson kriteret për eurozonën

BNB njoftoi ulje të re të normës kryesore të interesit