Rumjana Zheleva do të popullarizojë solidaritetin në punën e saj të ardhshme si eurokomisionere

botuar më 09-12-02 10.03.PD

Foto: BGNES

Kryetari i KE-së Jose Barroso ia dha ministres së jashtme bullgare Rumjana Zheleva, kandidate për komisionere evropiane, resorin “Bashkëpunim ndërkombëtar, ndihmë humanitare dhe reagim në kriza”. Ministrja Zheleva nënvizoi rëndësinë e këtij resori nga pikëpamja e përmasës së tij të jashtme politike, synimit të vendit tonë të përmirësojë imazhin e tij në planin e jashtëm politik dhe prioritetit të qeverisë që Bullgaria të bëhet faktori kryesor i stabilitetit në regjion dhe anëtare e respektuar e BE-së. Në një konferencë për shtyp ministrja e jashtme bullgare tha se është e kënaqur nga resori dhe theksoi se ai është shumë i rëndësishëm sidomos pas hyrjes në fuqi të Traktatit të Lisbonës më 1 dhjetor të këtij viti.

“Resori e përcakton ndihmën humanitare si një politikë të veçantë të BE-së dhe kjo përshkruhet në nenin 214 të Traktatit të Lisbonës – tha Rumjana Zheleva. – Detyra kryesore e BE-së në këtë drejtim do të jetë krijimi i Korpusit vullnetar evropian për ndihmë humanitare. Sipas mendimit tim, ky resor do të ndihmojë për realizimin e vlerave të BE-së si një lojtar global në skenën ndërkombëtare, i cili krijon zhvillim të qëndrueshëm dhe solidaritet midis popujve. Nën kryesinë e komisionerit të ardhshëm do të jetë Drejtoria e Përgjithshme “Ndihma humanitare” – një zyrë e BE-së, e cila përgjigjet për ndihmën humanitare në vende të treta, të prekura nga konfliktet ose fatkeqësitë e shkaktuar nga natyra ose nga njerëzit. Kjo do të kontribuojë për arritjen e qëllimit strategjik të KE-së që caktohet në programin e tij të ri, dhe pikërisht të popullarizojë dhe të imponojë Evropën si një partnere botërore. Ky qëllim përfshihet dhe në politikën e përbashkët të marrëdhënieve të jashtme, e cila është duke u formuar me hyrjen në fuqi të Traktatit të Lisbonës” – tha ministrja Zheleva.

Përmasat financiare të resorit, për të cilin do të përgjigjet eurokomisionerja bullgare, janë afro 1 miliard euro. Gjatë vitit 2008 BE-ja u ka dhënë ndihmë humanitare 60 vendeve në botë. Rumjana Zheleva shpjegoi se përpjekjet e BE-së duhet të përqendrohen në parandalimin e konflikteve që shkaktohen nga njeriu. Ajo përcaktoi cilat vlera do të popullarizojë si komisionere evropiane:

“Në vend të parë është solidariteti si një nga vlerat kryesore evropiane. Jo rastësisht BE është donatori kryesor në situata konfliktesh, krizash dhe fatkeqësisht” – tha zonja Zheleva.

Po të miratohet si komisionere evropiane gjatë janarit, Rumjana Zheleva do të jetë anëtarja e parë e KE-së me një portofol të tillë. Sipas procedurës, të nominuarit për komisionerë evropiane u përgjigjen pyetjeve të deputetëve evropianë në komisionet përkatëse të Parlamentit Evropian dhe pastaj votohet përbërja e KE-së. Anëtarët e Parlamentit Evropian mund të hedhin poshtë ndonjë nominim, siç u bë me kandidatin rumun para tre vjetësh dhe me kandidatin italian në ekipin të parë të kryetarit Jose Barroso.

Përgatiti në shqip: Ekaterina Tarpomanova

По публикацията работи: Iliana Rajçeva

Последвайте ни и в Google News Showcase, за да научите най-важното от деня!

Ndaje

Rumjana Zheleva do të popullarizojë solidaritetin në punën e saj të ardhshme si eurokomisionere

Më shumë nga rubrika

Grafitet në Bllagoevgrad kujtojnë historinë tonë 20-vjeçare në NATO

Java e Librit Ortodoks mbahet në qytetin Varna

Protesta para Teatrit Popullor “Ivan Vazov” u kthye në trazira para premierës së pjesës “Armët dhe njeriu”

WWF Bullgaria i kushton vëmendje mbrojtjes së arinjve

Magji festive me këngë, valle dhe takime me Plakun e Krishtlindjeve në Qytezën e Festave të Fundvitit në Pleven

Gjimnazistë bullgarë në një betejë me dezinformimin