Bullgaria dhe Shtetet e Bashkuara të Amerikës theksuan partneritetin e tyre strategjik në energjinë bërthamore

Ministri bullgar i Energjetikës Zheço Stankov zhvilloi një takim pune me Sekretarin e Energjetikës të SHBA-së Chris Wright. Të dy diskutuan projektet strategjike në energjinë bërthamore si një garantues kyç i sigurisë afatgjatë të energjisë së rajonit. Stankov shprehu vendosmërinë e Bullgarisë për të ndërtuar dy reaktorë të rinj në Centralin Atomik "Kozlloduj" duke përdorur teknologjinë amerikane AP1000 të Westinghouse dhe që vendi ynë të jetë i pari në Evropë me një reaktor funksional të këtij lloji.

Në takim u diskutua gjithashtu mundësia e krijimit të gigafabrikave të inteligjencës artificiale për të plotësuar infrastrukturën bërthamore. Ndër temat e diskutuara ishin edhe projektet për ndërtimin e hidrocentraleve të reja pompuese akumuluese dhe për eksplorimin e naftës dhe gazit natyror në shelfin e Detit të Zi të Bullgarisë.

Një Simpozium i Furnizuesve, i organizuar nga Westinghouse, u mbajt sot në Sofje. Sipas Stankov, gjatë momenteve kulmore të ndërtimit të blloqeve nr. 7 dhe nr. 8 të Centralit Atomik "Kozlloduj", pritet të punësohen rreth 10 mijë persona.