Java e parë e prillit në Bullgari i është kushtuar pyjeve

Mbushen 100 vjet nga fillimi i kësaj nisme të pylltarëve bullgarë, ndonëse veprimet për rigjenerimin, menaxhimin dhe mbrojtjen e pyjeve tona fillojnë menjëherë pas Çlirimit, në vitin 1878 shteti i sapokrijuar bullgar fillimisht formoi njësi mbrojtëse me rojtarë pyjorë që mbikqyrnin në këmbë dhe me kalë, të emëruar nga administratat vendore. Por një vit më vonë, më 5 korrik të vitit 1879, u themelua sektori i pavarur “Mbikëqyrja e pyjeve” pranë Departamentit të Pronave Shtetërore dhe Minierave në Ministrinë e Financave dhe kështu u vendos fillimi i shërbimit pyjor shtetëror në Bullgari, thekson Agjencia Ekzekutive e Pyjeve.

Më 12 prill 1925, Ministria e Arsimit Publik dhe Ministria e Bujqësisë dhe Pronave Shtetërore e shpallën zyrtarisht Festën e Pyllëzimit, e cila më vonë u kthye në “Javën e Pyllit”. Në këtë ditë, në kishën-monument "Shën Aleksandër Nevski", u mbajt një lutje për qytetarët, mësuesit dhe nxënësit, të cilët më pas mbollën 420,000 fidane dhe 20 kg fara në parqet dhe periferitë e qytetit të Sofjes.

Në vitin 2025, do të shënojmë disa ngjarje historike të rëndësishme që lidhen me historinë e pasur të pylltarisë në vendin tonë. Në fillim të vitit festuam 100 vjetorin e themelimit të arsimit të lartë pyjor në Bullgari – më 28 janar 1925, Këshilli Akademik i Universitetit të Sofjes mori vendim për hapjen e Degës së Pyjeve pranë Fakultetit të Agronomisë. Në kuadër të 100-vjetorit të Javës së Pyllit, Agjencia Ekzekutive e Pyjeve krijoi faqen e internetit “100 vjet Java e Pyllit”.

Nga 7 deri më 13 prill, iniciativa të ndryshme në mbarë vendin do të tërheqin vëmendjen mbi punën e pylltarëve dhe mundësinë që secili prej nesh të kontribuojë për mbrojtjen e pyjeve.

Përpiloi: Elena Karkallanova