Takim në Ambasadën e Shqipërisë me studentët e Universitetit të Sofjes

Takimi filloi me fjalimin e hapjes së Shkëlqesisës së Saj, Znj. Inid Milo, e cila trajtoi tematikën Shqipëria në NATO dhe rrugëtimi në BE/Prioritete të Politikës së Jashtme. Zonja Milo nuk kishte si të mos përmendte dhe falenderonte punën e palodhur të profesoreshave të nderuara të gjuhës shqipe nga Departamenti i Ballkanistikës, prof. Dr. Rusana Bejleri dhe Prof. Dr. Ekaterina Tarpomanova, si dhe raportet e shkëlqyera me këtë Departament në të cilin studentët e rinj ushqehen me frymën e dashurisë për gjuhën, kulturën dhe historinë e Shqipërisë. 

Gjatë takimit u zhvillua dhe një bisedë shumë e këndshme në të cilën morën pjesë edhe studentët që shpalosën aftësitë e tyre gjuhësore, njohuritë për Shqipërinë si dhe shprehën disa opinione të tyre shumë interesante që kishin lidhje me tematikën e takimit. 

Të ftuarit patën mundësinë të njiheshin pak më shumë me historikun e Shqipërisë përmes filmit "Vdekja e kalit", prodhim i vitit 1992 me regjisor Saimir Kumbaro. Ky është filmi i parë shqiptar që ve në dukje anët negative të sistemit komunist për shoqërinë shqiptare. Ai përfaqëson një nga pasqyrimet më realiste të përndjekjes politike gjatë Diktaturës së Proletariatit në Shqipëri. Për studentët ky ishte një film interesant falë të cilit arritën të shihnin Shqipërinë e vjetër gjatë viteve komuniste dhe të bënin krahasimin me Shqipërinë e ditëve të sotme, tashmë të ndryshuar. Pas filmit studentët panë edhe Ekspozitën "Rezistenca shqiptare gjatë Luftës së Dytë Botërore".

Ky aktivitet shërbeu si një platformë shkëmbimi mes të rinjve dhe Ambasadës si një mundësi për të nxitur dhe promovuar raportet mes dy vendeve tona dhe për të nxitur dashurinë ndaj Shqipërisë. Pikërisht këta të rinj janë ambasadorët e ardhshëm të cilët do të mbajnë të gjallë marrëdhëniet mes Bullgarisë dhe Shqipërisë dhe do të na çojnë drejt një të ardhmeje akoma më të ndritur dhe të bashkuar.